1st. Tuesday: India ram pumah petrol leh diesel man tihniam a ni a, Mizoramah pawh tihniam niin hman hman nghal a ni. Petrol chu litre khatah Rs. 2-in a hniam a, diesel man chu litre khatah pawisa 50-in a hniam thung.

2nd. Wednesday: MZP general headquarters chuan ‘Mizo zirlaite tana hnam dang nupui/pasal nei lo tura inzirtirna leh intiamkamna ní siam’ an lo rel tawh angin an hmang a, Mizoram hmun hrang hrangah hnam dang nupui/pasal nei lo tura inzirtirna leh intiamkamna hun an buatsaih. MZP tarlan danin, Aizawlah chuan college leh sikul eng emaw zatah hun an hmang a, MZP hruaitute’n Mizo ngei nupui/pasala neih a ṭul dan leh ram leh hnam humhalhna kawnga a pawimawh dante an sawi. Intiamkamna tura hming ziahna an buatsaihah zirlai sang chuangin hnam dang nupui/pasal nei lo turin intiamkamna hming an ziak a ni.

3rd. Thursday: Phunchawng Mel-10-ah truck AS-24 C-2498 leh Pulsar bike MZ-01 D-7782 an insú a, bike khalhtu Vanlallawmkima Chhangte (24) s/o Thangchungnunga, Lengpui Model Veng a hmunah a thi. Truck driver chu Rubel Ahmed Mazumder, Hailakandi a ni.Vanllalawmkima hi 10 Assam Regiment niin Bangalore-ah a awm a, chawlh hmanga a rawn haw lai a ni.

4th. Friday: Census of Govt. Employees & Workers, Aizawl District 2015 bu siam thar chu District Research Office, Venghluiah Federation of Gov’t. Employees & Workers president R.Lalrammawia’n a tlangzarh. Lehkhabu hi Economics & Statistic department buatsaih a ni a, Aizawl district bika Mizoram sorkar hnathawkte chhiarpui an neih hnua kawng hmang nei taka rem khawmna lehkhabu a ni.

5th. Saturday: Teachers’ Day a ni a; Mizoram hmun hrang hrangah hman a ni a, a hmanna pui ber MZP-in Synod Conference Centre-a an hman chu School Education minister H.Rohluna’n a hmanpui. H.Rohluna chuan, zirtirtu hna chu hna zahawm leh pawimawh a nih thu sawiin, zirtirtu nungchang mawi lo tlemtête avangin an hmingchhe hma bik tih a sawi a, “Zirtirtu thawk ṭhate vanga hmasawnna hmuh tur tam tak a awm erawh chu hmuh hmaih a ni lo a, chawimawi phûte pawh chawimawi a ṭul hle a ni,” a ti.

6th. Sunday: Synod Conference Hall, Lunglei-ah Chakma Kristian Fellowship chu Lunglei khaw chhunga Kristian ni sa, zirlai te leh sorkar hnathawk te leh mahnia eizawnna avanga cheng mek ten an din thar. Hei hi SMB in Lungleia Chakma Evangelist a dah Pu Lallianzuala Sailo leh Bru/Chakma Gospel Team, Chawngte te beihpui thlak rah chhuah a ni. Anni hian Lunglei huam china Chakma ringlo leh kohhran bel mumal lote zingah Crusade hlawhtling tak an nei a. Chakma Kristian Fellowship din tur pawh hian an phur tlang hle a ni. Tunah hian Chhim Working Comt. hnenah pawmpui tur leh a enkawltu tur bial leh kohhrante dil tura hmalakna kalpui mek a ni. Tun dinhmunah hruaitu atan Chairman ah Pu Lallianzuala Sailo leh Secretary ah Tv. Sala Singh te ruat an ni.

7th. Monday: RL Rinawma, IRS chu Principal Adviser to CM atan ruat a ni. CM office-ah a ṭhu ang. RL Rinawma hi Ministry of Finance-a Principal Chief Commissioner of Income Tax a nih laiin February 2015 khan pension-in a chhuak a ni.

8th. Tuesday: DIET chuan Aizawl South SDEO huamchhunga primary teacher-te Aibawk BRC hall-ah ‘New Texbook Training’ an buatsaih. Kumin aṭang hian NCERT adapted New Textbook hman a nih avangin training hi buatsaih a ni.

9th. Wednesday: Mizoram Legislative Assembly hnuaia Subject Committee-I chuan Kerala sorkar hmalaknate tlawh turin Aizawl an chhuahsan. Subject Committee-I member-te hi an chairman Chalrosanga Ralte hoin an kal a, member dangte chu – Lalrinliana Sailo, R.Vanlalvena leh Lalthanlianate an ni a, Assembly official-te’n an ṭawiawm. September 15-ah Aizawlah an lo let leh ang.

10th. Thursday: World Suicide Prevention Day (mahni intihhlum dona/venna ni) a ni a, Health department-a Mental Health Wing leh Aizawl West College-a Psychology department-te huaihawtin IPR Auditorium-ah hman a ni. World Suicide Prevention Day hmannaah hian Aizawl West College principal Dr Laithanzauva khuallian a ni a, Health services director Dr Rohmingthanga Ralte khualzahawm a ni. Mahni intihhlum avangin khawvelah kum tin mi nuai 8 chuang an thi ziah anga chhût a ni. Kulikawn Hospital-a Psychiatry department chuan September 2014 leh August 2015 chhungin mahni intihhlum tum an hnen pantu mi 28 an enkawl a, chungte chu mipa 20 leh hmeichhia pariat niin, thingtlang mi 12 leh khawpui mi 16 an ni.

11th. Friday: Mara Students Organisation (MSO)-te chuan Saiha khawpuia hnam dang dawr paruk, licence dik lo leh mi dang hming hawha hawnte an khârsak.

12th. Saturday: Lairam Isua Krista Baptist Kohhran (LIKBK) Assembly-in kumpuana a hman, ‘Thianghlimna’ tih bawhzuiin LIKBK ṭhalai pawlte hnatlang an nei a; khawlai leh vantlang hmun pawimawh – zun in, tuihâwk luankawr leh kalkawngte an tifai. Hnatlangah hian member ṭhahnem tak an thawk chhuak a ni.

13th. Sunday:Mizoram Presbyterian kohhran hnuaia Naupang Sunday School naupangte chuan anmahni pastor bial tinah inkhawmpui an nei. Inkhawmpui naah hian chang, thuinchhang leh hla te a inelna neih a ni.

14th. Monday: Mizo Hindi Zirlai Pawl (MHZP) buatsaihin Chanmari YMA Hall-ah National Hindi Day (Hindi Diwas) hman a ni a, minister of state Lalrinmawia Ralte-in a hmanpui. Lalrinmawia Ralte chuan, India rama cheng kan nih avangin Hindi a pawimawh tih sawiin, “India ram hi kan ta tih ngamna thinlung pu tur chuan Hindi kan thiam a ngai. Ram chhung hmun dangah hna thawk turin ṭhalai an chhuak fo a, harsatna an tawh lian ber chu ṭawng a ni. Ṭawng kan thiam phawt chuan khawi hmunah pawh Mizo ṭhalaite tan hna hmuh a harsa ngai lo,” a ti. Hindi Day hmannaah hian National Hindi Prachar Sabha result chhuaka ti ṭhate hnenah chawimawina hlan nghal a ni.

15th. Tuesday: Republic Veng, Upper Republic leh Republic Vengthlang thlànmual inṭawm mawng lam a min a, thlan 40 chuang a tichhia.

16th. Wednesday: Serchhip district deputy commissioner (DC) thar, Dr Lalrozama chuan a hna thar a zawm a, Serchhip DC piasaah DC mawhphurhna la mek tu VL Remliana hnen aṭang mawhphurhna a la a ni.

17th. Thursday: K.Lalsawmliana (59) h/o H.Lalnghinglovi, Sihphir chu chuap cancer avangin Synod Hospital-ah a boral. Pu Sawma hian a nupui, afate pahnih leh a tute pali a kalsan.

18th. Friday: Mizoram Nationalist Party leh Mizoram People’s Conference Party (Democrat)-te chu Congress party-ah an inchhûng lut a; Congress Bhavan-ah lawm luhna inkhawm neih a ni.

19th. Saturday: Muallungthu Bial KṬP-te chuan Aizawl Civil Hospital tan thisen pein, mipa 46 leh hmeichhia pariatte’n unit 54 an pe.

20th. Sunday: Tuivawl luiah Immanuel Malsawmzuali (thla 6) d/o Sithaniel Bisra (Mizo hming Zamawia), Keifang Vengthar chu a tla hlum. Malsawmzuali hi a ú hmeichhiain a pua a, a nute nen Tuivawl lui pan laia dai kai an tumna lamah an chesual a ni.

21st. Monday: MNF party chuan Aizawl bakah, district khawpui leh khaw dang hmun 16-ah Martarte Ni an hmang. Aizawlah chuan MNF treasurer Vanlalzawma hoa hman a ni a, MNF president Zoramthanga’n Kolasib-ah leh senior vice president Tawnluia’n Lungleiah an hmanpui. MNF-te hian Martarte Ni hi September, 20, 1980-ah an hmang ṭan a; Luangmuala Martar Thlanmual an siamah martar hming 1,563 ziah a ni tawh.

22nd. Tuesday: Mizoram Hindi Training College (MHTC) leh Central Hindi Directorate ṭangkawp chuan MHTC auditorium-ah ‘Significance and Importance of Hindi in the Development of Languages of the North East India’ seminar an buatsaih a, parliamentary secretary (HTE) H.Zothangliana’n a hmanpui. H.Zothangliana chuan, India rama awm tan Hindi thiam ngei a pawimawh tih sawiin, “Hindi hi India ram zau tak min phuarkhawmtu a ni. Ram inpumkhat nan Hindi ṭawng thiam a pawimawh,” a ti. Seminar hi HTE joint director H.Lalramhluna’n a kaihruai a, India ram hmun hrang hrang aṭangin paper present turin mi pasarih an tel bawk.

23rd. Wednesday: Young Lai Association (YLA) din champha vawi 41-na a ni a, YLA branch hrang hrangin an remchan dan angin an lawm a; branch tam ber chuan khua/veng chhung thenfai hnatlang, vantlang tana thil pawimawh tih nan leh hnam làm leh zai entirna leh intihhlimna atan an hmang.

24th. Thursday: 2015 Subroto Cup Football Tournament-ah Mizoram team (Govt Chawngfianga Middle School, Kolasib hminga kal) chuan Ambedkar Stadium, Delhi-ah Afghanistan aiawha kal Esteqal School, Kabul, Afghanistan chu extra time-a Norbert Lalfakawma goal hmangin 3-2 in an hneh a, a vawi lina atan Sub Junior inelnaah an champion. Mizoram champion puitu coach Lalthawmmawia chu best coach-ah thlan a ni a, final-a goal hnih khungtu Ramhlunchhunga Hmar chu best player-a thlan niin inhliam vanga final khel thei lo Lallawmkima chu best keeper-a thlan a ni bawk.

25th. Friday: Mosolman-te ni pawimawh, Id-Ul-Zuha a ni a, Mizoramah pawh Mosolman-te’n an hmang. Aizawlah chuan Lammualah ṭawngṭaina hun an hmang a, mi 3,000 chuang pungkhawmin, bungbúin an ṭawngṭai a ni. Aizawl Mosque-a Imam Maulana Bilal Ahmed kaihhruai ṭawngṭainaah hian Mizoram, India leh khawvel ram dangah remna leh muanna awm theih nan te, hmasawnna atante leh mipuite hamṭhatna atan an dil a ni.

26th. Saturday: Central KṬP buatsaihin Mizoram pumah ram tana ṭawngṭai rualna hun huaihawt a ni a, Aizawlah chuan Lammualah neih a niin member thahnem tak an fuankhawm a ni.

27th. Sunday: Mizoram UPC ṭhalai pawl, Pentecostal Youth Department (PYC) General Conference vawi 21-na, September 25th. atanga Sakawrdaia neih chu a ṭiak. An thurel ṭhenkhatte chu – kum 2016-a hmalakna atan zûk leh hmuam do beihpui thlak te, mihlim kawng zawh neih te, thu leh hla kûtpui buatsaih te, live crusade buatsaih leh blood donation camp neihte a ni. Kum 2016 budget atan Rs. 16,85,800/- an pawm a; kum 2016 conference chu Vairengte-ah neih tur a ni. PYD inkhawmpuiah Mizoram UPC pastor bial 72 aṭangin palai riak lut 2,013 an awm a ni.

28th. Monday: AH&Vety Minister C.Ngunlianchunga chuan Lawngtlai AH & Vety Complex-ah NLUP hnuaia vawk vulh thlangtu chhung 98 hnenah final installment Rs. 10,050/- ṭheuh a hlan. C.Ngunlianchunga chuan, Mizoram sorkarin mipuiten hma an sawn loang tih hlauin an thawh thiam zawng eizawnna a thlan tira, chu an eizawnna thlanah chuan a bul tan sakin mamawh engkim a pein, a vil zui tih a sawi.

29th. Tuesday: Chief minister Lal Thanhawla chuan DoNER minister Dr. Jitendra Singh chu Delhi-ah a hmu a, Mizoram mamawh hrang hrangte a thlen. Dr. Jitendra Singh chuan Mizoram chu India rama mau ngah state a nih vangin furniture atan mai ni lo, lehkha puan siam nan hlawk taka hman thei an ni tih sawiin, “Mau hmanga lehkhapuan siamchhuah chu state sumhnar mai ni loin ṭhalaite hna siamsakna tur a ni,” a ti. Chief Minister hian Aizawl leh a chhehvela community hall sakna tur ruahmanna chu ngaih pawimawh hmasak (priority) zinga dah tur leh hmarchhak state pariatte hnam ziarang tilang chiang thei tura hmasawnna hnathawh a ṭul thute Dr. Jitendra Singh hi a hrilh.

30th. Wednesday: Ni thum awh tur Anthurium Festival 2015 chu Lengpui Mini Sports Complex-ah ṭan a ni a, Governor Lt.Gen. Nirbhay Sharma-in a hawng. Larsap chuan, Mizo tam takin sum hmuh nana an hman anthurium pangpar hming chawia kût siam chu thil inhmeh tak nia a hriat thu a sawi.

LADC MDC INTHLAN FINAL RESULT
.
Sangau East : F. Rohnuna, MNF- 633 votes.
Sangau South : ST. Laldailova, INC- 664 votes.
Sangau West : C. Lallungmuana, INC- 625 votes.
Cheural : L. Lawmkima, INC- 479 votes
Lungtian : H. Biakzauva, MNF- 649votes.
Lungpher South : C. Lalhnuna, MNF- 791 votes.
Vawmbuk : T. Zakunga, INC- 849 votes.
Bualpui West : V. Zathang, MNF-564
Bualpui East : K. Vanlalsanga, INC- 569
Lawngtlai Bazar : C. Sangchhunga, INC- 521votes.
Lawngtlai Vengpui : VL. Hmuaka, INC- 838votes.
Lawngtlai Chandmary : C. Lalsawmzuala, MNF- 707
Lawngtlai Council Veng : Manghmunga Chinzah, MNF- 840
M. Kawnpui : N. Sangnawni, INC- 1239 votes.
Bungtlang South : JC. Ngurluaia, INC- 646votes.
Sakeilui : Suresh Chakma, INC-
Sekulh : Apetow Lawmsanga, INC- 1257 votes.
Tuithumhnar : KC. Malsawmdawngliana, INC- 971 votes.
Vathuampui : C. Lalneihkhuma, INC- 955 votes.
Lawngtlai College Veng : Lalchhuanawma, INC
Lawngtlai -III : T. Lalengmuana, MNF-
Lawngtlai AOC : LR. Dingliana, Independent
Paithar : V. Zirsanga, INC-1090
Diltlang South : Laltlawmlova Chinzah, INC-814
Chawngte P : Andrew Laltlanzara, MNF-854
.
INC : 16
MNF : 8
Independent : 1
Thu Nawi :

Lawngtlai AOC bial a independent tling LR Dingliana hi MNF Ticket beisei chang ta lo a ni a, MNF lam ticket set sual dik tak a ni.
Cheural bial INC chakna hi Vote 1 a ni a, EVM vote ah an in zat (draw) chiah a, Postal Vote 2 tla ah pakhat in INC vote in pakhat in BJP a vote avangin INC a tling a ni. Tin, he bial ah hian mi 3 khaw dang/bial danga vote thlak tawh Cheural khua a thlak nawn leh an awm an ti a, a linglo lam hian an complaint a thu a kal mek niin ka hria.(Chiang fak lo, Vote thlak nawn erawh chiang).
Pu V.Zirsanga Paithar bial a INC a tling hi CEM nilai a ni a, sorkar athar ah Chairman a ni ang.
Sekulh bial Apetow-a hi a khingpui MNF candidate in Vote 350 vel chauh a hmuh avangin in hnehna sang ber a ni.
Bazar bial a tling Pu C.Sangchhunga hi Minister Pu C.Ngunlianchunga u a ni a, bye election a tling ta lo kha a ni. Hetah hian independent Pu C.Vantlungluaia hian MNF lam a puih avanga INC kha tla ta ni berin a lang.
Lawngtlai vengpui bial a tling ta Pu VL Hmuaka INC hi term hmasa MNF hneh lo tu kha a ni a, tunah hian CEM atan thlan a ni.
Chawngte P bial atanga thlan tlin Pu Andrew MNF hi term hmasa a MNF tling awmchhun Pu B.Lalduhsaka fapa a ni a, a pa in May 28 a a boral san hnu khan a bial mipui ten chah chhuak in an thlang tling ani.
Term hmasa ah khan INC 19 MNF 1 Independent 5 an tling a, independent 4 in MNF lam ah tangin Opposiotion ah an thu a, pakhat in INC a pui thung a, tun tum ah hian MNF lam puitu te chuan MNF ticket an chang vek a, pakhat chiah Lawngtlai Chandmary bial ah Pu C.Lalsawmzuala thlan tlin a ni a, INC lam puitu Pu Thanglawma Bungtlang bial chuan INC Ticket a chang lo.Term hmasa (2010-2015) tawp lam 2013 a Pu C.Ngunlianchunga CEM nilai MLA a thlan a nih tak khan a bial ruak Bazar bial atangin MNF party Pu Glory Lalropuia Chinzah chuan INC rorel lai (ruling party) hneh in thlan tlin a ni a, tichuan MNF lam hian MDC 2 an nei ta a ni.
Diltlang bial atanga thlan tlin Pu C.laltlawmlova INC hi, Pu C.Ramhluna MNF ticket changtu in MDC EM nilai INC ticket chang ta lo Pu A.lalngailova a ken na bial a ni a, Pu Ramhluna chakna nen pawh a hneh zolo a ni.
INC tling ta lam ah hian Election vawi khat face na an tam vak lo, MNF lam pawh mi thar 3 anni.

Hun a liam hnem leh ta, kum 30 emaw lai a herchhuak ve tader mai. Tlangval tuai tir ka ni a, Kawlthei huanah chuan nula hmeltha eltiang ka chhai ve khat khat thin. Thianzaho-in kan kal a, an in luah a lian lemlo bawk a pawn lama thu tawkte pawh an awm nawk thin.

Kulikawn a ka pa in a ka khawsak ve lai a ni a, ka pindan chu a kil ber bangpui chhaklam ring a ni. Tah chuan a thian nen tumkhat chu anlo leng a, a bianga ka fawhsak ka intihtheih rilruk zia maite kha aw. Tichuan hun a lo liam ve zel a, induh tawn viau e tilo chuan kan karah thuleng a awm ta. Ka thian kawmthin ber pakhat chuan ngaihzawng dang nei anga min hrilh chu na kati em em mai a, awmngaihna pawh ka hrelo. Tun hnua ka ngaihtuah leh hian, “tinge amah thuchiang zawhna chang kalo hriat loh,”tiin keimah leh keimah ka insawh thinrim fo reng a ni.

Ngaihzawn loh nupui ka neihsanta a, felin puitling viau mahse keimahah hlimna tak a awm ngailo…hmangaihna kawngah. Nupui pawh neita foin ka tluang theilo em em mai a, ka nun lahin a zir bawk heklo, neih tlak ni bik hek lo vi.

Tichuan kum 30 a ral chuan kan inhmu hlawl mai a, kan chanchin inhrilhna hun kan nei hlauh. Avan pawi vawng vawng tak em. Tinge ka hmangai tura ka ngaih ka thiante khan thu lawilo min lo hrilh ni? A thianu lahin kan pualin “Ma-in A Hmangaih Che Asin” tiin, hlain, H. Lalthakima min auh tir lawm lawm kha a ni si. Kei lahin thinurin ka tihtauh san ngawt mai kha a ni si a le…

(Luangliam)

1st. Sunday: Khawvel Sunday School Ni a ni a, Presbyterian Kohhran, Baptist Kohhran leh Lairam Isua Krista Baptist Kohhran ten an hmang.

2nd. Monday: Excise & Narcotics department-a Anti-Narcotics Squad-te chuan Ṭhuampuiah heroin hram 11 leh a neitua puh Rampianmawia (28) s/o Vanlalchhuanga, Ṭhuampui, Aizawl nia inchhál an man. Rampianmawia hi NDPS Act tlawhchhanin thubuai siamsak a ni.

3rd. Tuesday: March 3-6, 2016 chhunga Champhaia KṬP General Conference neihna tur pandal chu New Champhai khelmualah sak ṭan a ni. Pandal hi a dung ft. 320 leh a vâng ft. 270-a zaua sak tur a ni a, a sak nan Rs. 18,00,000/- an ruahman. Pandal sakna khelmual hi Champhai leilet záwl tawntirha awm a ni.

4th. Wednesday: Mizoram RMSA chuan Chanmari YMA Hall-ah state level Kala Utsav an buatsaih a, district tin aṭangin high school zirlaite an tel a, hnam lam leh thil dangte hmangin an intihsiak. Kala Utsav hi RMSA deputy state project director C.Chawngthantluanga’n a kaihruai a, School Education director K Lalthawmmawia’n a hmanpui. Thupui chu ‘Hmeichhe naupang hum la, zirtir rawh’ tih a ni.

5th. Thursday: Doordarshan leh Mizoram State Sports Council (MSSC) chuan nit hum awh tur Brigade Field, Bawngkawnah Mizo infiamna hmanga intihsiakna ‘Indigenous Games Festival 2005’ an buatsaih ṭan a, Governor Lt.Gen. Nirbhay Sharma-in a hawng.

6th. Friday: UPC (Mizoram) hnuaia Pathian thu zirna, Apostolic Theological Institute (ATI) Board chairman Rev. H.Vanlaltlana (57) chu cancer vangin Grace Nursing Home-ah a thi. Rev. H.Vanlaltlana hi hun eng emaw chen UPC (Mizoram) general secretary nihna chelh tawh a ni.

7th. Saturday: November 26, 2015-a Aizawl Municipal Corporation (AMC) inthlan tura chuh tuma hming pe lut mi 56-te nomination paper chu returning officer-te’n an endik a, pawm vek a ni.

8th. Sunday: Lairam Isua Krista Baptist Kohhran (LIKBK) inkhawmpui lian ber dawttu, LIKBK Regional Church Council inkhawmpui November 6th. zana Lawngtlai district-a kohhran pangaa ṭan chu a ṭiak. Inkhawmpuiah hian an kohhran chhunga thil pawimawh chi hrang hrang an rel a ni.

9th. Monday: Aizawl Municipal Corporation (AMC) leh Lai Autonomous District Council (LADC) inthlan tura chuh tuma hming pe lutte inhnuhdawh hun chu a tàwp a, AMC-ah mi pahnih an inhnûkdâwk a, LADC-ah mi paruk an inhnûkdâwk bawk. AMC leh LADC inthlan tura inhnuhdawh hun a tawp hnuah candidate-te chu an symbol tur pek nghal an ni.

10th. Tuesday: Mizoram atana a tumkhat nan St. Paul’s Higher Secondary School zirlai 16 leh zirtirtu pakhatte chu November 15-21, 2015 chhunga US Space Camp & Rocket Centre, Huntsville, Alabama-a National Aeronautics and Space Administration (NASA) Space Camp-a tel turin Mizoram an chhuahsan.

11th. Wednesday: Hindu-te sakhaw kût pawimawh leh ngaihhlut berte zinga mi, Diwali a ni a, Mizorama Hindu sakhaw zuitute’n hmun hrang hrangah hlim takin an lawm. Diwali-ah hian pathiannu Lakshmi lawm nan an inte êng chi hrang hrang hmangin an chei a, bati-te an chhi bawk.

12th. Thursday: Mizorama Horticulture College, Thenzawl rama dinna turin Horticulture directorate committee room-ah Mizoram sorkara Horticulture department leh Central Agricultural University, Imphal hotute’n a hmun tur ram (land lease) inhlanna an nei a, memorandum of understanding an ziak nghal. Ram inhlanna leh MoU ziahnaah hian Central Agriculture University aṭangin vice chancellor Prof. M Premjit Singh a tel a ni.

13th. Friday: Directorate of Science & Technology bultumin Mizoram Science Centre-ah ‘International Year of Light’ hman a ni a, Planning principal adviser Ngunlala Chinzah-in a hmanpui. Inkhawmah hian PWD, PHE, Power & Electricity, Mizoram University, Pachhunga University College, Zirtiri Residential Science College, RIPANS, IASE, DIET, NEILIT, NIT-Mizoram, Women Polytechnic, Mizoram Science Society, Science Teachers’ Association Mizoram (STAM), Mizo Academy of Sciences leh Mizoram Mathematics Society aiawhte an tel.

14th. Saturday: Nununa Renthlei lehkhabu ziah, ‘Via Dolorosa’ tih chu MZP Conference Hall-ah Prof. Laltluangliana Khiangte-in a tlangzarh. Lehkhabu hi Christian epic novel an tih ang chi a ni.

15th. Sunday: Republic Vengthlang Presbyterian Kohhran chuan an kohhran silver jubilee an lawm ṭan. Silver Jubilee hi November 22, 2015 thleng an lawm dawn a ni.

16th. Monday: National Press Day a ni a, Mizoram Journalist Association leh IPR department-te chuan IPR directorate auditorium-ah an hmang.

17th. Tuesday: Mamit DC Lalbiaksangi chuan a pisaah Mamit MJA member-te a kâwm a; an district hmasawnna turin thawhhona ṭha tak an neih a beisei thu a hrilh. Lalbiaksangi chuan, Mamit district chu district dangin buaina an neih ve loh tam tak khawih tur a awm avang leh hnam chi hrang hrang inremna khawih pawi thei thil thleng tam tak a awm thu a sawi a; thuthar thehdarh kawngah rilru fím tak pu turin Mamit MJA-te chu a sáwm a ni.

18th. Wednesday: November 26, 2015-a Lai Autonomous District Council (LADC) inthlana duty turte chuan Lawngtlai DC conference hall-ah vote an thlak ṭan.

19th. Thursday: Synod Press-in cutting machine a lei thar chu Synod senior executive secretary Rev. Lalzuithanga’n Pathian hnenah a hlan. PRESCOM general manager R.Lalmalsawma sawi danin, cutting machine hi German company Polygraph siam niin, a model chu SEYPA115 a ni a; India pawisain cheng nuai 20//- chuang man a ni.

20th. Friday: Aizawl Theological College (ATC) chuan ATC Quadtrangle-ah Annual College Day an hmang a, college zirlai ti ṭhate hnenah lawmman leh certificate an sem nghal. ATC Annual College Day hi Synod moderator Rev. Lalrinmawia’n a kaihruai a, ATC principal Rev.Dr C Lalhlira’n ATC dinhmun a sawi. Synod executive secretary (Theological Education) Rev. Lalramliana Pachuau-in diploma certificate-te leh lawmmante a sem a; speaker Rev.Dr JS Sadananda, Council of Senate of Serampore-a master-in thuchah a sawi bawk.

21st. Saturday: Aizawl North-III Assembly bye-election chu tluang taka neih a ni a, vote 61.98% a tla. Aizawl North-III bye-election-ah hian zing dar 7-ah polling station 19-ah vote thlak ṭan a ni a, tlai dar 4 thleng hun hawn a ni. Tlai dar 4-a vote thlak hman lo, polling station huam chhunga awm tawhte chu dar 4 hnuah pawh vote thlaktir an ni. He inthlanah hian Lal Thanzara INC, K.Vanlalvena MNF leh Lalduhoma ZNP te an ding a ni.

22nd. Sunday: Baptist Mipa pawl (BMP) Aizawl City Area Meet BCM Central Church biak-in, Upper Republic-a Inrinni atanga neih chu a ṭiak. Thupui chu ‘I ram lo thleng rawh se’ tih a ni. BMP hi May 4, 1980-ah Thingsaiah din ṭan a ni.

23rd. Monday: Aizawl North-III Assembly constituency bye-election-a vote tlate chu Assembly Secretariat Annexe building-ah chhiar a ni a, Indian National Congress (INC) candidate Lal Thanzara chu a tum thum nan vote 6,175 hmuin hneh taka thlan tlin a ni. Lal Thanzara chuan, diknain hnehna a chan thu a sawi. A khingpuite pahnih dinhmun chu- K.Vanlalvena, vote 2,790 leh Lalduhoma, vote 1,887 a ni. Mi 39 chuan candidate zinga duh nei lote thlakna None of the Above (NOTA)-ah an thlak a thung

24th. Tuesday: BJP-in village council-a sorkarna an siamna, Pangbalkawn V/C chu BJP V/C member pahnihin Congress an thlâwp tâk avangin Congress V/C-ah a inlet.

25th. Wednesday: Aizawl Municipal Corporation inthlan tura ward IX-a BJP (NDA) candidate Lalchhuanawmi chuan a báwm a khâr. Lalchhuanawmi’n bâwm a khâr thu ziaka a tihchhuahah chuan, “Keimah min duhsaktu zawng zawngte’n min vote lo a, an duhzawng vote mai turin ka ngen e,” tih a ni.

26th. Thursday: Aizawl Municipal Corporation (AMC) leh Lai Autonomous District Council (LADC) inthlan chu tluang taka neih a ni a, vote thlak zawhah AMC bik hi chhiar nghal a niin hetah hian MNF in seat 19-ah seat 11 lain an tling a; INC leh MPC inkawpin seat 8-an la thung. Hetih lai hian LADC inthlan erawh Inrinni lo awm tur (Dt. 8/11) ah chhiar a ni thung ang.

27th. Friday: Aizawl North-III Assembly bye-election-a thlan tlin, Lal Thanzara, Indian National Congress chu MLA atan Assembly speaker Hiphei-a’n rinawmna thu tiamtirin a la lut. Lak luhna inkhawm hi chawhma dar 11-ah Assembly Annexe Conference Hall-ah neih a ni a, chief minister Lal Thanhawla, minister-te leh MLA-te’n an hmanpui.

28th. Saturday: November 26, 3015-a Lai Autonomous District Council (LADC) inthlanpuia vote tlate chu Lawngtlaiah chhiar a ni a, seat 25 zinga seat 16 latu Indian National Congress (INC)-in sorkar an siam thei dawn. Bial pariatah MNF party an chak thung a; independent-a ding zingah pakhat a tling bawk.

29th. Sunday: Baptist kohhrante chuan Rualbanlote Ní an hmang. He ni pual hian Mizorama Baptist kohhran hrang hrangte chuan chawhma inkhawmah hun an hmang a, thupui chu ‘Ka khawngaihna i tan a tawk e’ tih a ni.

30th. Monday: Haulamtlingi w/o Thangdeihtunga te in, Assam type chu a kâng a, mi pathum an kâng hlum. In hâltu nia rinhlelh Pausawmthanga (28), Champhai Vengthar chu an man nghal. Pausawmthanga hi Thangdeihtunga (L), Haulamtlingi pasal nau a ni.

Tun hnai LPS Tukverh show ka en tha ka ti te ka rawn share e.

Extreme Sports
BMX, Free Running, Roller Skating, Skate boarding te Mizo naupang ten an lo thiam ve ta hle mai. Hmun a awm loh teh lul nen. Fitness a tan tha bawk sia. Lo hau tawh suh u:)

Click here to view the embedded video.

Aizawl Zingkar

Zingkar exercise la leh zinchhuak tur kan tam ve ta bawk a niang, zingkar kawng kam a eitur zuar pawh an tam ve ta. MC kawtah hian ka ei ve tawh a hman kum khan, paratha kan thar tui khawp mai. Mahse kan thingpui hi vairampur a awm reng thingpui ngaina tan chuan a duthusam awm loh thin. Pi Rii zing walk te hi han interview pah se, show tha deuh a ni tur ka lo ti thin a. Kawngkam ah a la walk thin em? 90’s kha chuan a zingkar walk hi Tuikhuahtlang ah khan ka hmu ngun ve khawp mai.

Click here to view the embedded video.

Aizawl Tourism
ATC atang Aizawl la thlir loh te hi thil awm thei a ni, A hmun a awm reng tan pawh. Ka thupui chu “We are the tourist” tih hi a ni. State pawn leh ram pawn a mi hi an rawn kal hum hum dawn lo. Kan ram a tourist tam ber chu keimahni kan ni tur a ni. Kan khawpui, kan ram hi i fang ang u.

Click here to view the embedded video.

He kawng hi a hming chiah ka hre lo. 1999 May/April ah ka lo kal ve tawh a. Buichali lam aiin a hnaih zawk avangin shorcut an ti mai khan ka hria. Sihhmui Tlawng lei a chim avangin PWD in an chei that dawn thu kha LPS news ah ka ngaithla khan ka hria a. Nimin khan hawn a ni awm e. Ka nau in pic hi min rawn thawn. 1999 kha chuan tui tam lai a nia, mar boat in kan kai.

1st. Tuesday: Aizawl North-III Assembly bye-election-a thlan tlin, Lal Thanzara chu Mizoram sorkara minister turin Governor Lt.Gen. Nirbhay Sharma chuan rinawmna thu tiamtirin a la lut a, Cabinet Minister a ni dawn a ni. Swearing-in ceremony hi Raj Bhavan Durbar Hall-ah neih a ni a, chief minister Lal Thanhawla, minister, parliamentary secretary leh MLA eng emaw zat an tel.

2nd. Wednesday: MNF office bearer-te leh Aizawl Municipal Corporation (AMC)-a MNF aṭanga thlan tlinte Mizo Hnam Runa ṭhukhawm chuan AMC mayor atan Lalhmingthanga an thlang a, deputy mayor atan Lalringliana an thlang. MNF OB leh AMC-a MNF aṭanga thlan tlinte hian MNF AMC Legislature Party pawh an siamfel nghal a; leader-ah C.Lalmuanpuia, deputy leader-ah C.Lalthansanga, secretary-ah Lalhmingmawia leh treasurer-ah B.Lalawmpuii te an ruat.

3rd. Thursday: J.Lalrinliana, Republic Veng, Aizawl chu a khawsak mekna Lungleia a office-a inthiarnaah thia hmuh a ni. J.Lalrinliana hi Lunglei PWD Mechanic Division-a junior engineer a ni a, a inthiar a rei deuh avangin thawktu dangte ngaihṭha loin an enfiah a, thiin an hmu a ni.

4th. Friday: Lunglei HSS Evangelical Union-te chuan Lunglei Civil Hospital-ah thisen pein, mipa 27 leh hmeichhia 22-in unit 49 an pe.

5th. Saturday: World Soil Day a ni a, Agriculture department chuan an directorate conference hall-ah an hmang a, parliamentary secretary (Agriculture) Lt.Col. ZS Zuala’n a hmanpui. Food and Agriculture Organisation (FAO) conference, June 2013-a neih chuan World Soil Day hman a rel a, UNO General Assembly vawi 68-na chuan December 5 chu World Soil Day atan puangin, khawvel hmun hrang hrangah hman ṭhin a ni.

6th. Sunday: Bible Sunday a ni a, Bible Society of India (BSI) zawmtu kohhran hrang hrangten hemi pual hian programme an hmang.

7th. Monday: Cable TV digitisation tih tura hmalaknate thlirletin GAD secretary Lalrinliana Fanai hoin a pisaah meeting neih a ni a; sorkar laipui thuchhuak angin, Mizorama khaw lian zual 23-ah TV digitize hi kalpui phawt tur a ni. Sorkar chuan district tina DC-te hma la tura hrilh angin additional DC ṭheuhte chu nodal officer-ah ruat an ni.

8th. Tuesday: Tanhrila Inbro Poultry Hatchery Farm-a arpui kah râi aṭanga a notê keutir chu AH&Vety director Dr LB Sailo hoin a keutirna khâwl aṭangin lak chhuah a ni.Arpui kah râi zat hi 9,500 a ni a, a note keutir chu a hlawhtling hle a, 90% vel a keu niin an sawi.

9th. Wednesday: Myanmar rama tui lian tuar Mizote hnenah Central YMA-in ṭanpuina an hlan. Ṭanpuina hlanna inkhawm hi Tahan-a Methodist biak-inah neih niin, Tahan Mizo Welfare Association president Rosanga’n a kaihruai. Tanpuina tur sum hi vehbur khawna tuak a ni a; cheng nuai za chuang lai a tling khawm a ni.

10th. Thursday: Aizawl Municipal Corporation sorkar thar chu AMC hall-ah lak luh a ni a; mayor atan PC Lalhmingthanga leh deputy mayor atan Lalringliana te lak luh an ni. AMC sorkar lak luhna inkhawmah hian councillor tharte an kal kim a, Aizawl district magistrate Dr Franklin Laltinkhuma’n ward hmasak dan indawtin couicillor-te chu rinawmna thu tiamtirin a la lut a ni. Aizawl mayor thar PC Lalhmingthanga chuan, Aizawl Mayor atana thlan a ni chu lawmawm a tih thu sawiin, “Mipui sorkar, mipui huapzo kan kalpui dawn. Pathian hruaina hnuaiah councillor-te leh mipuite nena thawhhona ṭha tak nen Aizawl khawpui hmasawnna hi nasa takin kan thawh ka ring tlat a ni,” a ti.

11th. Friday: Aizawl leh Lungleia HDFC Bank hnathawkte chuan thisen unit 23 an pe. Aizawlah chuan Aizawl Civil Hospital-ah mipa pangain an pe a, Lunglei Civil Hospital-ah mipa leh hmeichhia pakua ve vein an pe bawk.

12th. Saturday: Khawthlangtuipui kân tur tipper MZ-02 A-7415 chu a phurtu marboat chawpin tuiah a pil a, thi leh hliam an awm lo. Tipper hi ramri hung hna thawktu Satguru company enkawl lai, hna thawhna hmun Kalapani pan tur a ni a, Khawthlangtuipuia thiarkài tura marboat-a a lut tur a chesual a ni. Marboat hi vaukam lama an hnuh nghal avangin a pil vek lo.

13th. Sunday: Mizoram Presbyterian Kohhran Synod Inkhawmpui vawi 92-na chu a tiak. Inkhawmpuiah hian probationary pastor ni lai mi 18 chu pastor atan nemngheh a ni a, probationary pastor atan mi 24 dah ngheh an ni bawk. Mizoram Synod hnuaiah hian presbytery 51, pastor bial 289, tualchhung kohhran 1,266, pastor 516, pro.pastor 61, kohhran upa 5,456, kohhran member 5,98,778, dan zawh kim 4,10,175, chhungkua 1,27,371 an awm a; kum kal ta chhungin nau piang 9,714 leh mitthi 3,623 an awm a ni.

14th. Monday: Mizorama political party pahnih – Congress party leh ZNP-te chuan an pisate kum 2015 atana khârna inkhawm an hmang. MPCC chuan Congresss Bhavan chu January 12, 2016-ah an hawng leh dawn a, ZNP chuan January 14, 2016 an hawng leh ang.

15th. Tuesday: F.Zorempuii d/o Hranghmingthanga, Kawnpui Venglai chu Tlawng luiah a tla hlum. F.Zorempuii hi Kawnpui HSS-a pawl 12 zirlaite’n Mizoram Synod-in Mizorama Chanchin Ṭha thlenna hmasa bera a pawm tâk, Kutbul lui kama Rev. William Williams hriatrengna lungphun tlawhnaah a kal ve a, Tlawng luia insil tura an kal chu a chesual ta mai a ni.

16th. Wednesday: Tuialhthei dek chhuak ramte’n a man an tihhniam hret avang leh sorkar laipuiin tuialhtheia Excise Duty lak a tihpun avangin India ramah petrol leh diesel man tihdanglam a ni a; Mizoramah pawh hman ve nghal a ni.

17th. Thursday: Serchhipa District Industries Centre chuan Serchhip DC Conference Hall-ah NLUP third phase leh fourth phase hnuaia awmte hnenah ṭanpuina an sem a, DC Dr Lalrozama’n a hmanpui. Ṭanpuina hi mi 737 hnenah bank kaltlangin Rs. 1,11,60,000/- sem a ni.

18th. Friday: Pu R. Romawia, Art & Culture Minister chuan Selesih YMA Hall-ah ‘Zawlnei Chawngkhupa Hriat Reng Nan’ tih lehkhabu Dr. Zohmangaiha, IRS (Rtd.) ziah a tlangzarh. Tlangzarh inkhawm hi Pu K. Lal Nghinglova IAS, Chairman Zawlnei Chawngkhupa Memorial Society in a kaihruai a ni. Zawlnei Chawngkhupa Memorial Society hian Zawlnei Chawngkhupa Lungphun vawi thumna an nei nghal a ni. Pu Chawngkhupa hi 9th April, 1909 ah lo piangin 24th June, 1990 ah a thi a. Amah hriatrengna lungphun hi 18th December, 1992 khan Selesih-ah neih a ni a. A Lungphun hmasa ber hian duh thu a sam loh avangin siam that vek a ni a. 18th July, 2009 khan a Lungphun vawi hnihna neih a ni leh a, a vawi 3 na hi Pu Chawngkhupa tu leh faten bul tanin Art & Culture Department tanpuina sum hmangin a Lungdawh chu 4th August, 2015 khan zawh fel a ni leh a ni.

19th. Saturday: Isua Krista Kohhran general headquarters, Upper Republic-a Golden Jubilee Building chu IKK Assembly chairman Upa Lalhriata’n a hawng. Golden Jubilee Building sakna tur hian a hmun cheng nuai 28/-a an lei hnuah in hi cheng nuai 35/- vel sêngin an sa a ni.

20th. Sunday: Indian Super League-ah Chennaiyin FC chuan 3-2 in FC Goa an hneh a, ISL nomawi an chawi. Chennaiyin FC –ah hian Mizo tlangval Jeje Lalpekhlua leh Lalhmangaihsanga Ralte-te an tel a; Jeje Lalpekhlua hian ISL Emerging Player of the League lawman a dawng nghe nghe.

21st. Monday: Governor Lt.Gen. Nirbhay Sharma chuan Raj Bhavan-ah Mizorama kohhran leh tlawmngai pawl hrang hrang hruaitute a kâwm a; Krismas puala kohhran leh tlawmngai pawlte’n mi harsate thilpek an hlan ṭhin chu lawmawm a tih thu a sawi. Governor hmuhnaah hian kohhran aṭangin Prebyterian, Baptist leh Salvation Army hruaitute an tel a; NGO aṭangin Central YMA, MHIP leh MUP aiawhte an tel bawk.

22nd. Teesday: Mizoram Mathematics Society (MMS) chuan chuan IPR Auditorium-ah Mathematics Day an hmang a, Finance minister Lalsawta’n a hmanpui. Lalsawta chuan, khawvel huapa hriat hlawh mathematician ropui tak tak India ram aṭanga an chhuah thu sawiin, “Chu’ng mithiamte zingah chuan Mizote kan la tel ve lo a, kawng thui tak zawh tur kan la nei. Mathematics subject-ah Zofate’n hmabak kan la ngah em em a, kan thiam lo a, kan ngaina lo a, ngawihnawm pawh kan ti lo,” a ti a; Mizo zirlaite’n mathematics an ngaihdan an thlâk hlawk a ngaih thu a sawi.

23rd. Wednesday: Pu David Lalhmachhuana, News Stringer LPS Vision chu Aizawl Hospital ah Thawhah in a boral.

24th. Thuesday: Rev. Chawnghmingliana, Zamuang Bialtu Pastor chu Synod Hospital-ah Rectum Cancer avangin a thi. Rev. Chawnghmingliana hi Upa K.Darthanga leh Lalnunziri te fa pali (Mipa 3 leh hmeichhe 1) zinga a upa ber dawttu niin October ni 26, 1982-ah Aizawl Civil Hospital-ah a piangin kum 2012 March ni 22-ah Serchhip Vengchung Pro. Pastor a nih laiin Varthanpuii Varte D/o Varthanchhunga Khatla nen an innei a, fa pakhat – Lalmuanhlua Khawlhring (kum 2) an nei. Kum 2009 Synod Inkhawmpui Mission Vengthlang Biak Ina neih chuan Pro. Pastor atan a la a, kum 2010 – 2011 chhungin Bungtlang ‘S’-ah Pro. Pastor-in a awm a, hetah hian Bial Secretary a ni. Kum 2012-ah Serchhip Vengchung-ah Pro. Pastor-in a awm leh a, kum 2012 Synod Inkhawmpui Chanmari Kohhran Biak In-a neih chuan Pastor atan a nemnghet. Kum 2013 atangin Zamuang Pastor Bial a vawng a, a hriselna that tawk loh avangin kum 2015 Synod Inkhawmpui chuan kum 2016 atanga Synod Office-a awm turin a rel nghe nghe.

25th. Friday: Vairengte Police te’n HPC hel nia rinhlelh mi 2 an man a, magistrate thu angin Kolasib District jail-ah dah luh nghal an ni. HPC helte hi (Sergeant invuah chawp) Israel Lalthlengliana (29) Kolasib College veng leh (Sergeant invuah chawp tho) Robert Malsawmthanga (25) Saiphai khua te an ni. HPC hi pawl hnihah an inthen a; Police-in an man pahnihte hi Hmarkhawlian-a hmunpui nei Lalhmingthanga Sanate kaihhruai zing ami an nia thudawn a ni.

26th. Saturday: Rulkual khua tlangval pahnih Benjamin Lalhriatzuala (18 ) S/o Thawmmawia leh Lalruatsanga (22) S/o Lalzova te chuan mi nu Lalchhingpuii leh Nula pakhat an pawngsual rawn.

27th. Sunday: Mizoram Presbyterian kohhran hnuaia Sunday School kaikim lawman lak ni a ni a; mi thahnem takin an dawng. Kaikim lawman hi kumthar Chawlhni hmasa berah hlan thin a ni na a; kumin atang hian a kum ngeia inhlan hi Synod duhdan a nih angin an kalpui a ni.

28th. Monday: Pi Lalrini (101) w/o C.Rokhuma Mission Vengthlang chu a boral.

29th. Tuesday: Aizawl Municipal Corporation in Aizawl khawpui chhunga veng chei nalh lawmman a siamah Hlimen chuan lawman pakhatna, Rs. 1,00,000/- leh thu ziak an dawng a, 2-na chu Ramhlun North niin Rs. 70,000/- leh thu ziak an dawng a, 3-na chu Bungkawn niin Rs. 50,000/- leh thuziak an dawng a, veng 5-te hnenah consolation prize pek an ni a, chungte chu, Bawngkawn, Bethlehem, Leitan, Electric Veng, Kanan Veng, Luangmual leh Mission Veng te an ni a, Rs. 20,000/- theuh an dawng a ni.

30th. Wednesday: Mizoram Youth Commission Chairman, Pu T.Sangkunga chuan a office-a thuthar la khawmtute’n an kawmna ah state pawn leh ram pawnah Mizo thalai 3,000 chuang thil zir turin an thawn chhuak tawh niin a sawi.

31st. Thursday: Mizoram sorkar chuan ruahmanna a siam angin MAMCO, ZENICS leh ZOHANDCO chu a ti tawp ta.

1. EN TEH, I RINAIIN A TLAI TAWH A NIA AW…
Setana Pawl, Setana Tihdân, Setana Thiltih lam hawia chet dân (Satanist/ Satanic/Satanism) rêng rêng hi tun hma chuan, Mimal, Pawl, Khawtlâng leh Kohhran-ten an do-rawn ţhin. Hetiang lam hawia a nâwlpui leh a nâ thei ang bera hmalâkna Witch Hunt (Setana Betu/Setana Pawl/Dawithiam, etc. te Zawnchhuah leh Tihhlum) chungchang kha kan hre ţheuh awm e. Kohhran kha a phusa ber a nih kha. Khatah khân, “Dân Bawhchhiatna Thurûk” (Setana Fin-kherek Program) avangin, Kohhran leh Sorkar ţangrual khân, Mi tam tak chu Dawithiam/Setana Betu-ah ngaiin mi 60,000 vêl zet chu (ringtu/miţha tam tak pawh dâwta puh avangin an tel) an tihlum (khaihlum/hâl-hlum) a nih kha.

Mizoramah pawh Setana Betute/Setana Pawl inti te chu an awm ve niin a lang a. An thiltih leh Anmahni Inpuanna aţangin Setana Pawl an nih thu kan hre ţhin. Kohhran-in an buaipui vak lova, mut-mawh hnâr-mawh ah pawh an nei lem lova, Police lamin an buaipui zui ta ţhin niawm tak a ni. Mizoramah chuan Setana Pawl-te hi Mimal, Chhungkua, Pawl, Khawtlâng, Kohhran leh Police lamin an la do hneh êm avangin, ualau takin an che ngam lo.

Hetihlai hian, Setana Program dang, langsâr lo lam aţanga a chêtna – “Dân Bawhchhiatna Thurûk” erawhchuan, Mimal, Pawl, Chhungkua, Kohhran thlengin min khawih a. Min luhchilh a, kan buai mêk thung. Kohhran Dalna & Pathian Thu Pawm Dalna (Liberal Theology/Church), Mawngkawhûr Pastor (Gay/Lesbian Pastor), Khawvêl Changkanna (Modernism), Kristian Nun Tihdân Pangngaia duhtâwkna (Nominalism), Khawvêl Thil Ngainatna (Materialism), Sex Hmansualna (Sexual Immorality), Mahni Nihna (Tuai leh Patil) Pawm lohna (Gender Issues-Transsexual/Transgender), Neih Inangte Inneihna (Same Sex Marriage), etc. te chuan tunah hian min rûn mêk a. He Dân Bawhchhiatna Thurûk hian hmun a khuar thûk tawh hle a ni. I rinaiin a tlai daih tawh a nia!!

2. AMERICA SORKAR PHALNA THLAPIN SETANA PAWLTE AN CHE!
Zoram Kohhran leh Mizo Awmna tawh phawtah chuan, Krismas Hlim taka hmang tura kan inbuatsaih vâng lai khân, Detroit City, USA-ah chuan Setanan thil râpthlâk tak a lo ti ve thung! December 19, 2015-ah khân Detroit City (USA)-a Setana Pawlten America Sorkar Dân Phalna thlapin Setana Biak In (Satanic Temple) hawnna leh hlanna an nei a ni!!! He thil thleng hi USA-a Thilthleng Hmasaber a ni hial. A Chhan chu Sorkar Phalna Thlap-a Setana Pawlte chêtna hi ala awm ngai lo. Setana Betute leh Setana Pawlte Fin-kherek zia leh Khawvêla Setana’n a Hnathawh Dân a Fimkhur tawh zia leh a Fin tawh zia hi a lang chiang hle, ngaihtuah ngun a ngai nasa tawh a ni.

December 19, 2015-a Setana Chêtna Fing takah khân, America Sorkar Dân phalna thlapin Setana chu a che a. An Director Jex Blackmore chuan Setana Pawlte Thiltum a Puang-chhuak a ni (The Nation’s First State-Sanctioned Satanic Ceremony Performed at Michigan Capitol by Director of The Satanic Temple of Detroit). Hriatthiam awlsam tura siamrem a ni a, a pawimawh zual chauh lâwr a ni. A Thusawi bul leh tawpah Setana chu chawimawina a pêk phawt hnu-ah, hetiang hian a sawi a:-

“Vawiina Setana Pawlten bul kan ţanna, hringfate tâna ênna, kan nihna dik tak min puanchhuahsaktu hi Lucifer, Zing lam fapa, Helhmang hnên aţanga Thilthlâwnpêk kan dawn a ni. Setana Pawl kan ni a, rilru, thlarau leh sex-ah, mimal zalenna anga kan duh duh-a zalên taka kan chêt hi kan tum ber a ni. Setana zia leh nungchang keimahni-a awm, chatuan atâ tawh hel reng hi nasa takin chawisâng ila, hrêmhmun thleng rawkin i thlunzawm teh ang u. Setana biakna hi fing taka chêt lâkna a ni. Kristian sakhua emaw, sakhua hrim hrim emaw kan do lo. Sakhua-te hi an inhaw-tawnin, an intichhe-tawn zawk a. Keini chuan, hnuaichhiah leh rahbehte (woman’s liberation, same sex marriage, freedom of sexual activities) lamah kan ţang tlat a ni. Zuitu kan zawng lova, Setana duhzawng ti-hlawhtling turin mimal tinte ţangho turin kan sawm che u a ni.”

Setana Pawl-ten Setana Duhzâwng an Puanchhuah lai hian, Kristian (ringtute) tâna Thil Pawimawh tak tak a lo lang tel ve tlat mai! Sawi hmaih chi a ni hauh lo mai le!

1. Pathian hi a awm ngei tih a thusawi aţangin a chiang ta tlat!
2. Bible hi a lo dik ngei tih a ti-chiang hle bawk.
3. Setana mizia, nungchang leh thiltum, Bible-a inziak-te a dik tih a rawn tichiang.
4. Setana Pawl tih takah, an program a nawi hle.
5. Setana Pawlte zingah hian Mi pangngai tak hmêl-pu hmuh tur an vâng pharh mai!
6. Hrêmhmun hi a awm ngei tih a chiang.

3. ENGTIN NGE SETANA CHU A CHÊT ȚHIN?
Setana chêt dân leh Ringtu & Ringlote kawng dik lova hruaina atâna Hmanrua a hman-te hi sawi tur tam tak a awm ang. Ngaih Pawimawh zualte chauh lo lâwr ta mai ila:-
(1). Khawvêl thil ngainatna & Duhâmna (Materialism),
(2). Khawvêl Changkânna & Hmasawnna (Modernism),
(3). Kohhran-a Member (Kristian) nih ve tawp duhtâwkna (Nominalism),
(4). Sex Hmansualna (Sexual Immorality),
(5). Mahni Nihna (Tuai leh Patil) Pawmlohna (Gender Issues- Transsexual/Transgender),
(6). Neih Inangte Inneihna (Same Sex Marriage),
(7). Mawngkawhûrte Pastor atâna lâk (Gay/Lesbian Pastor),
(8). Pathian Thu Pawm Dalna & Kohhran Dal (Liberal Theology/Church),
(9). Sakhaw Puithiam-te Nungchang Tênawm & Râpthlâk (Gay/Sodomy Life of Priests & Nuns),
(10). Pathian Thu Zirtir Dân Dik Lo (No salvation outside church, Indulgence, Purgatory), etc.

Achunga Setana Chêt dân tlângpui kan târlan-te khi kan sawi zau lutuk hman lovang. Khawvêl thil ngainatna leh Changkânna-in min bual-ât nasat tawhzia hi i ngaihtuah ngai em? I Bible tellova kum 1 pawh i tlei theih laiin, Cellphone/ Scooter/ Car tello chuan, Ni 1 chu sawi loh, Dârkâr 1 pawh harsa i ti hle a ni lawmni? Kohhran-ah nise, Member nih ve tawp duhtâwk mai kan pung tual tual a, Chhiatni-ţhatni atân chauva Kohhran bel a, hming ziak kan pung tial tial. Revival Camp & Crusade senso-te hi ava tam ta êm!!! Sex Hmansualna lah hri chak tak ang maiin a darh zau tial tial a. Tun Krismas 2015 liam tâ maia, Țhian Pakhat Aizawla Damdawi Dâwr Neitu chuan, Rai theih lohna damdawi leh Condom an hralh hnêmzia a sawi!! Kohhran leh KȚP-a Rawngbawltu duhawm tak tak-te pawh an tel ţeuh ngei ang le!

Setana Fin-kherek Program, “Dân Bawhchhiatna Thurûk” hi Ringtute (Kohhran)-te zingah chauh a thawk lova. Misual, ringlo mite zingah pawh Setana Bumna avangin râwng tak leh râpthlâk taka thil ti, sual leh fing thiam taka thil ţha lo tam tak ti ţhin sawi tur an tam hle. Mahni Nihna Pawm Lo (Hmeichhia-in mipa nih duh, Mipa-in hmeichhe nih duh), Tuai leh Patil kan pung tual tual a. Pathianin min siamdâna lungawi lova Transsexual Or Transgender hial pawh an va tam ta êm! Khawvêl Sorkar lah chuan a ngai pawimawh tulh tulh a, Form Fill-up ngai (e.g. Aadhaar, etc.)-ah pawh an telh tawh lehnghal! Pathian-in “Mihring chu Mipaah leh Hmeichhiaah a siam” tih chu Setana Bumna avangin kan tidanglam ţan ta! Hei hian nghawng râpthlâk tak ala nei zui lehnghal. Tunah chuan, “Neih Inangte Inneih phalna” leh “Mawngkawhûrte hial Pastor atâna lâk ţulna” a hring chhuak ta a. Setana’n Pathian Anpuia siam Mihringte leh Ringtute min sawisak dân hi a nâ vawng vawng tawh mai a ni.

Kohhran History lama kan hmuh leh Vawiin thlenga Kohhran Hruaitute Chanchin lungchhiatthlâk tak kan la hriat fo chu, Corruption chi hrang hrang leh Nun Tênawm leh Pawlawh taka Sakhaw Puithiam-te an nun thu (Corrupt/Gay/Sodomy Life of Priests & Nuns) te, Kohhran-a Zirtirna Dik lo awm (No Salvation outside church, Indulgence, Purgatory)-te hian Setana hmun kan kian mai ni lovin, Setana hnathawh nasa takin a ţanpuiin a tichak ţhin a ni.

He Dân Bawhchhiatna Thurûk thawk mêk- Pathian Thu Pawm Dalna (Liberal Theology), Kohhran Dal (Liberal Church), Thlarau mite hnualsuatna, Kohhran-a Ringtu der-te sengluh, khawvêl taka Kohhran hruai, etc. te hi Kohhran-a a Hnârkaitu leh a Bân-râng chin-te Thiltih a ni bawk si, tihngaihna ava vâng êm! Kohhran pawh NGO nên a danglamna a tlêm tawh khawp mai. YMA takin, Politics takin, khawvêl takin Kohhran hi an hruai mêk a. Setana hian Kohhran hi hetiang hian min khal chho mêk a, a hruai mêk tawh a ni.

Khawvêla Thuhriltu ngaihsânawm tak tak– Brian Houston (Hill Song), Creflo Dollar, Joel Osteen, Benny Hinn, Joyce Meyer-ten “Mawngkawhûrte Pastor atâna lâk” (Gay/Lesbian Pastor) leh “Neih Inangte Inneih” (Gay/Lesbian Marriage) chungchang hi Bible Zirtirna kalh a nih thu an sawi ngam ta miah lo mai te hian, rilru a tinâ ngawih ngawih mai! An Kohhran-a Pawisa Thawh tam tam an nih avangin an sawisêl ngam lova, Mawngkawhûr Pastor leh Mawngkawhûrte Inneihna (Gay/Lesbian Marriage) an thlâwp (support) tih a chiang si, a beidawnthlâk hle mai.

4. SAKAWLH-AH SETANA HI A LO CHANG DAWN!!!
Mizo Kristian-te hian Sakawlh hi kan buaipui hle mai! Sakawlh hi buaipui êm êm ngai chu a ni lova, a Chanchin erawhchu Hriat ve a ţul. Sakawlh chanchin hi kan Hriat tlêm lutuk avangin kan buaipui zual ta niin alang. A Hre ber tur leh a Buaipui ber tur Kohhran hian a ngai pawimawh tâwk lova, a tih-tur a tih loh avangin Kohhran member leh mipui-te kan chi-ai ni berin alang. Kohhran-in a Ngaih pawimawh lohna chhan hi Pathian Thu Pawmdân Felhlel (chiangkuang lo) vang a ni mai thei.

A tawi thei ang berin sawi ta mai ila. Tunah chuan, Setana hian a rûkin, Mihring leh Sorkar etc. te hmanruaa hmangin hna a thawk rih. Chuvangin, “Dân Bawhchhiatna Thurûk” tiin a Hnathawh dân pawh sawi a ni (2Thes.2:7). Mahse, Ringtute’n Lal Isua an Tlûksanna (Phatsan/Hawisan) Hun râpthlâk tak a thlen hunah chuan, Khaptu (Thlarau Thianghlim) chu a awm tawh lovang a. Chumi Hun-ah (Pathianin Setana tâna hun bik-tê a ruat/phalsak hunah) tak chuan Setana chu Mihring (Sakawlh)-ah a lo chang ang a, Sakawlh hmangin khawvêlah hian duhtâwkin a che dawn a ni (2Thes.2:1-12, Thup.13). He Tlûksanna Râpthlâk tak/Lal Isua Phatsanna Râpthlâk tak (Great Apostasy) hi ala thleng lova, Sakawlh hi a lo lang rih lo tih hre bawk ila.

Setana (Drakon/Rûlpui tar Diabola) chuan, Sakawlh chu (Mihringa a lo channa a nih avangin) ama thiltihtheihna, lalţhutthlêng leh thuneihna nasa tak a pe ang (Thup.13:1-10). SETANA (Drakon/Rûlpui tar Diabola) leh, SAKAWLH (Antichrist/Satan incarnate) Tuifinriat aţanga lo chhuak (Thup.13:1-10) leh SAKAWLH DANG, Lei aţanga lo chhuak (Zawlneider. Thup.13:11-14)-te chu an ţangho dawn a ni (Thup.13:14-15, cf. Thup.16:13, 19:19-20, 20:10). Mi ţhenkhat chuan, TRINITY a do tih entirnân Setana hian Un-holy trinity (Satanic trinity) a rawn hmang (duplicate) ve a ni, an ti (e.g. Pa, Fapa & Thlarau Thianghlim VS Diabola (Setana), Sakawlh & Zawlneider).

Sakawlh Chhinchhiahna, Sakawlh Number 666 chungchang hi tawitê-in sawi zui lawk ila. Sakawlh hi Khawvêla a lo lan hunah chuan, Khawvêl hi Sorkar Pakhatah leh Sakhaw Pakhatah (One World Government & One Religion) siam leh din a tum dawn a. Sakawlh (the Beast, Satan Incarnate) chu pathian angin a intârchhuak ang a, pathian anga biak a phût dawn a ni. Sakawlh (Antichrist/Tuifinriat aţanga lo chhuak) Țanpuitu ber leh Sakhua/Thlarau lama Mite Bumtu ber tur chu Zawlneider (Sakawlh, Lei aţanga lo chhuak) a ni thung ang. Hetiang Mihring, Rorêltu hi Khawvêl History-ah an la awm rih lo, Chuvangin, Thupuan Bung 13-a Sakawlh hi a lo la lang lo tih a chiang nghal bawk.

Tichuan, Amah Zuitute chu Setana tâ an ni, Setana Zuitute (Setana Betute) an ni tih Chhinchhiahna atân “Sakawlh Number 666” emaw, “Sakawlh Hming” emaw, chu an Chalah emaw, an Kut Dinglamah emaw “Chhutkai” (engraved) a ni dawn a ni. Sakawlh “Chhinchhiahna” hi Greek ţawngin “Charagma” tih a ni (Thup.13:16-17). Greek “Charagma” hian a sawi tum chu, “Ran vulhtuten an Ranvulh Chhinchhiahna atâna thirling hmanga Ran taksaa Chhinchhiahna an Chhutkai hi a ni. Chuvangin, he Chhinchhiahna hi, “Mitlâwnga hmuh theih (khawiha hriat-theih) tura taksa langsâr laia Chhinchhiahna chhutkai” (engraved visible branded mark on the body) a ni a, UID, RFID/UFID, Electronic or Computerize Identification Mark lam a kâwk lo.

Sakawlh Chhinchhiahna hi Mitlâwnga Hmuhtheih (khawiha hriat-theih) Chhinchhiahna a ngaihna chhan hi, Thupuan 15-16 kan en chuan, Sakawlh Rorêlna hnuaiah hian, Chunglam aţanga Khawvêl pumpuia Pathian Thinûrna Berhbu leihbuak a nih tâk avangin, Ni êng a chhuak ţha dawn lova, Electric Power supply a mumal dawn lova (power backup engmahin a daih lovang), Inkalpawhna leh Inbiakpawhna (communication) a chhe deuh vek dawn a, Lirthei leh Telephone, Internet-ten awmzia an nei lovang. Khawvêl pum-huapa chhiatna thleng avangin Electronic Machine hmanga Sakawlh Chhinchhiahna lo chhuichhuah tum chu thil âtthlak tak a ni dawn. Chuvangin, Setana, Sakawlh pawh hian Mitlâwng leh Kuta khawiha hriat-theih mai tur chi Chhinchhiahna (Manual Identification Mark) hi a hmang ngei dawn a ni.

5. SORKAR LEH KOHHRAN DÂN PHALNA-IN SETANA A CHE ZÊL DAWN!?
Setana hi Sakawlh-a a lo chan tak tak (fully incarnate) hun, a hun tawp lamah chuan, Khawvêla Dân zawng zawng leh Sakhaw Dân zawng zawng chu a rawn Bawhchhe fai vek dawn a. Chuvangin, Dânbawhchhepa (Lawless One) tia hriat a ni ang. Khawvêl hi Sorkar Pakhatah leh Sakhaw Pakhatah (One World Government & One Religion) siam leh din ala tum dawn a ni. Amah, Setana, Sakawlh (the Beast, Satan Incarnate) chu pathian angin a intârchhuak ang a, pathian anga biak a phût dawn a ni (2Thes.2 & Thup.13, Dan 11, Eze.28, etc.).

Tunah erawhchuan, Sakawlh hi a la rawn lang rih lova, a rûkin “a Suah-sual leh Bawhchhiatna thurûk” hi a thawk rih a, mite a hîp theih nân leh mite a hneh theih nân hun engemaw chen chu Khawvêl Dân leh Kohhran Dân hmangin nasa takin a che phawt dawn a ni. Kohhran-ah pawh Hruaitute chu Kohhran Dân hmangin a insual-tir ang a, Denomination War (Kohhran Pawl Inhuatna & Indona) hmangin Kristian-te chu inpumkhat thei lovin, rawngbawl ţha thei lovin a siam dawn a ni.

Kohhranah ngei pawh, Setana hi Kohhran Dân (Church’s Constitution/Law) leh Pastor/Upa (Church Leaders)-te hmang thovin a che tawh a, a che mêk a, a che zêl dawn. Mahni Kohhran ţheuh hi han belchiang ila, han chhût vang vang teh. Pastor, Upa, Revival Speaker, Rawngbawltu sawisêlbo leh duhthusam hmuh tur leh sawi tur an vâng pharh mai asin!!! Khawtlâng leh Mihring nunphung hrim hrim pawh hi ava dal tawh êm! Kohhran pawh Dalna leh thiangzauna chi hrang hrang – Pathian thu-a dalna leh thiangzauna, Lal Isua aia Mahni Kohhran Pawl chauh hmuh-dikna leh dah-lalna (denomination centered not Jesus’ centered) a ni deuh vek tawh.

Kohhran-a Fulltime-a Rawngbawltute hi tam tak chu Hlawh vanga thawk an ni tih a hriat ngawih ngawih ta! Pastor/Fulltime rawngbawltu ni si Sorkar hnathawh-a thawk satliah mai mai pawh an kat nuk tawh. Kohhran-a Rawngbawlnaah nise, Sum & pai ngah ngah, Pastor & Upate tilawm thiam thiamin chanvo an chang ţha chho mêk mai lo maw? Thlarau-mi deuh nia kan hriatte chuan Pulpit rawngbawlna pawh an chang pha meuh tawh lova, Kohhran Dân leh Hraiten ramri a khamsak takah chuan, Thlarau mite aw hriattur pawh a vang ta!!

6. SETANA HI I HLAU EM? I INVÊNG THEI CHIAH ANG MAW?
Setana Pawlten hetia America Sorkar Phalna meuhva, Setana Thiltum leh Duhzâwngte Ti-hlawhtling tura an chêt ngam tâkah chuan, khawvêl hmun hrang hranga Setana Pawlte pawhin hma an la ţan ve ngei ang tih a rinawm. Amaherawhchu, Ram leh Hnam Dân-in Daidanna a siam-ah a innghat thui hle ang. A enga pawh chu lo ni sela, Setana Betute leh Setana Pawlte hi an zalên chho zêl dawn niin alang.

Mihring hian ama chakna leh theihna ringawtin Setana hi a do ngam ang em? A hneh theih ang em? Teuh lo mai. Tum pawh tum suh. Vântirhkoh Chungnungber Mikaela meuh pawh khân, Mosia ruang chungah khân, Setana kha a challenge-in, a sawichhe ngam lova, “Lalpa’n Hau Zawk Che Rawhse,” a ti ta ringawt a nih kha!!! (Juda 1:9). A chhan i hria em? Mosia kha a Sualna-te avang khân Vantirhkoh chungnungber pawhin a ţan ngam lova, a ţanpui thei lo! Setana lakah khân a hum thei lo!! A rûka i Sual pai reng chung leh, Sual sim hauh lovin, Setana hi lo zuamin, lo nêl miah suh ang che, nâ tak leh râpthlâk takin i mualpho mai ang.

Țhian pakhat chuan, Ramhuai Hnawhchhuahnaa a tel thu a sawi a, “RAMHUAI-PAIIN, REVIVAL SPEAKER/UPA/PASTOR A LO HLAU LO KHAWP MAI, A RÛKA AN SUALNA-TE A PUAN SAK A, AN ZAK KHAWP MAI A! AN HLAWHCHHAM DER MAI” tiin min hrilh!! Mite Thurûk/A rûka an Sualna Puanchhuahsak theihna hi Setana Pâwlte pawhin an nei. Ringtu inti (Fake Christian/Ringtu-der)-te tân a hlauhawmin a zahthlâk dawn, a râpthlâk dawn khawp mai! A dera nung, A dera Kristian, Pathian be lova, Kohhran/ Pastor/ Upa-te be ţhin Kristian-te tân Mualphona râpthlâk tak a thleng dawn a ni. Setana, a rûka a rawng an bawl a, a duhzawng an tih ţhin ngei khân, mipui mithmuh leh hriatah Setana ta an nihzia ala au-chhuahpui ang a, ala ti-mualpho dawn a ni. Hun ţha i neih lai hian insiam ţha vat ang che!

Chuvangin, Setana leh a Pawlte hi Mihring chaknaa hneh theih an ni lo, “PATHIAN RÂLTHUAM FAMKIM” chauh hi Setana kan hneh theihna hmanraw awmchhun a ni. Pakhat chauh pawh a tâwk lo, “Pathian Râlthuam Famkim-a inthuam” a ţul. Hei hi Setana laka kan him theihna tur leh kan do a, kan Hneh theihna tur awm chhun a ni. “I CHAKNA RING LOVIN LALPA CHAKNA CHU RING ZEL ANG CHE” (Eph.6:10-18, 2Kor.10:4, Rom 13:14, Eph.4:24, 2Tim.3:17, etc.).

2015 MIZORAM

*Nikum lamah Governor kan nei zingin pawl engemawzat phei chuan an lungawi loh thu an puangchhuak hial hlawm a nih kha. Engemawzat kan nei chung khan December thla tawp lamah kumthar lama tan mi hran hmachhawp Central lam hotute chuan an nei leh ta.

He kan Governor thar hi Dr Aziz Qureshi a ni a; sorkar laipuiin a bàn a nih loh chuan Mizoramah hun hman zawh a tum thu leh Mizoram tan theihtawp chhuaha hna thawh a tum thu a sawi laiin Mizoramah thla thum em pawh a awm hmain ban a ni leh a; Kesri Nath Tripathi in thla hnih tling lo deuh min awp leh hnuin tuna kan Governor hi kan nei leh ta a ni.

Mizoram Governor thar Lt.Gen. Nirbhay Sharma (69) h/o Jyotsna Sharma hi kum Arunachal Pradesh Governor ni lai a ni a; 1946-ah Uttar Pradesh khawpui Lucknow-ah a piang a, National Defence Academy-a a zir chhuah hnua kum 1966-ah Indian Army a zawm a; sipai chawimawina PVSM, UYSM, AVSM leh VSM-te a dawng hman. Thiamna lamah M.Sc, M.Phil (Defence Studies) a ni.

*Kumthar kan chuangkai deuh chauh tiin Aizawl khawpui chhungah ngei tualthahna rapthlak tak a thleng.

Republic Veng, Aizawl-ah Mizoram a thil thleng thei tur pawha lo ngaih loh, thil rapthlak tak a thleng a. Republic Veng mi tho Laltlanchhuaha (37) s/o. Parzuala chuan Republic Presbyterian Biak In thlanga awm Pu Sangliansiama te chhungkua mi 5 (panga) chu chemte hmangin a tihlum a ni.

Pu Sangliansiama te chhungkua hi Republic Presbyterian Biak In thlanga Springfield Higher Secondary School Building chhawng chung ber, kawng-an chung luah an ni a. He misual Laltlanchhuaha hi Pu Sangliansiama te inah hian lutin, pawisa a dil a, Rs. 1000/- an pe a. Pawisa hi a dil belh a, chhungkaw pa ber Pu Sangliansiama’n a hnial chu Pu Sangliansiama (57) s/o Chalneihthianga hi a vit nghal a. Pu Sangliansiama farnu Pi Vanlalchhungi (54) hlau tlan chhuah tum chu Laltlanchhuaha hian hnuklutin a vit zui a, kawngkapui chu chhunglamah a kalh nghal bawk. Chhungkaw nu ber, Pu Sangliansiama nupui Pi Khualthangi (57) bedroom a tlan lut chu Laltlanchhuaha hian um zuiin, a vihhlum hnuah Pu Sangliansiama nau Chalkunga (Chungtlang) fa Samuel Lalrinchhana (14), Springfield School a Pawl 9 zirlai chu a that leh a. Pu Sangliansiama leh Pi Khualthangi te fa neihchhun kum 5 mi Isaac Lalrinnunga chu misual hian na takin a vit hliamin a hnuah damdawi inah a thi leh ta nghe nghe.

Hetih lai hian mangang au thawm hriain mi engemawzat chuan Pu Sangliansiama te In hi an thleng a, misual Laltlanchhuaha chu tukverhah zuang thlain, inhnuaiah Hostel naupang ten an lo man ta a ni.

*Mizoram Chief Minister hlui, Brig Thenphunga Sailo chu kum 93 mi niin Aizawla Private Hospital pakhatah Lung lam thatlohna avangin a thi.

Mizoram sorkar chuan ni thum chhung a sun nghe nghe.

Pu Thenphunga hi kum 1922, January ni 1-ah Lungleiah Thuampui Sailo Lal Vancheuva leh Lalnu Hrangvungi te inkarah a piang a, Serkawn ME School atangin Elementary a zo a, hetah hian Mizoram pumpuiah pakhatna a ni.

Mizo zinga sipai officer hmasa ber a ni a, kum 1942 khan sipai-ah lutin IInd. Lieutenant dinhmunah British Army a zawm a, A hnathawh that avangin kum 1960-ah Lieutenant Colonel-ah a kaisang a, a hnu lawk, kum 1963-ah a hnathawh that avang bawkin Colonel-ah hlankai a ni leh nghâl a, a hnu kum thumah kum 1966 khan Brigadier-ah kaisantir a ni leh a, hei bakah hian sipai chawimawina sang AVSM a dawng bawk.

Kum 1974-ah sipai atangin a chawl ta a ni.

Kum 1946 khan Pu PS Dahrawka fanu Thansiami chu nupuiah neiin fapa 3 leh fanu 1 an nei.

April 17, 1975 khan People’s Conference Party din chho in, kum 1977 kha Mizoram chief minister pahnihna atan thlan a ni.

*Sorkar laipui ruahman angin Direct Beneficial Transfer of LPG (DBTL) LPG customer ten Non-Subsidy in Gas kan lei ta vek mai.

He kalphung thar hian mipui min ti buai hle mai a; bank account neih vek ngai leh card holder leh kan id inmil veng ngai vel chungchang bakah midang card lei te phei chu kan buai hle a nih kha.

Kan lakna man hi tunhmaa kan lakna thin zat aia toin kan lei tawh anga; tichuan, tunhmaa kan leina thin anga nei turin bank lamah pawisa a lut thung dawn a ni.

*Kumthar kan chuang kai chauh tihin Zoramah a chunga tarlan tak ang khian tualthahna rapthlak takin Aizawl khawpui min nuai a; nikum Krismas laia veng chei lawman latu chu thlanmual a nih avang a nih ringtu engemawzat an awm hial. Chu achhapah kumtawp ni tla lai hmuh tur a awm loh avang leh kumthar ni chhuak a duai hle avang tein kumchhia ni dawnah mi tam tak chuan kan ngai hman.

Mahse, rinloh tak maiin Vanlaiphai khaw lamah chuan tlangval puitling uaih tawh hi naute hnute hnekna fawpin tazaa an hne chiam mai a; an insawi dan chuan naute anga rilru thianghlim neih a tul thu an sawi.

Ze dang lo chhuak zelin, thenkhat chuan puak te an ngen hial a ni. Ze thar lo chhuak zelin nuih uar uar te, sihal ang maia u chiam maite an ching chho zel a. Zoram hmun hrang hrangah kangkaiin Mari’n Krista a nei ang mai khan nau hrin a lar hle. Mipuiin kan hrethiamlo in mak kan ti hle a nih kha.

Hei hian harhna keng telin Kelkang lamah phei chuan harhna mak danglam tak a thleng.He harhna hi Zoram hmun hrang hrang mai bakah state pawn atangin leh foreign atang hial pawhin a chhimin mipui kan kal ruih ruih mai a nih kha.

Tin, Aizawl khawpuiah ngei Aizawl suartluanin mi thahnemtakin bingbiletin kawng an zawh bawk.

*Ni 20th February, 1997 atanga hman tan Mizorama zu khap burna dan MLTP Act 1995 chu kum17 zet hman a nih hnuah, a thlaktu tur dan thar ‘Mizoram Liqour (Prohibition & Control) Bill’ chu ni 10.7.2014 khan Mizoram Assembly-ah passed a ni a. Tichuan thu a kal zel a; Mizoramah ngei, sorkar remtihnain zu kan zuar ve ta.

He dan thar hmanga zu zawrhna an hawn hlim chuan dawr awmna veng neitu mipui te chuan theihtawpin an dodal a; mahse, rei an tih hleihtheih hlawm loh avangin dawr chu a kal zel a; tun hi kan thleng ta a ni.

Zu lei tum thalai an tam thei hle a; tawngkam thar ‘intlar’ tih a lo chhuah phah.

Sorkar lamin khauh taka kalpui tum mahse, dan pel hreta zu lei hriat tur an tam hle thung.

Mahse, kan lo rin ang em em erawh chuan buaina chu a thleng tam lemlo niin a lang. Sorkar in phalna siam mahse kohhran lam erawh chuan khauh taka dodal tumin zu lei phalna permit neite chu rawngbawlna pawh chelhlo tura ti an awm nual.

*Mizoram sorkar chuan zirna in hrang hrang a tan hun zing dar kua ni thin chu dar riatah a sawn hma.

He thil hi duhlo a sawisel leh sawisel mai lo a a do a do pawh pawl leh mimal engemawzat an awm. Heng zinga langsar ber chu Mizo Student Union (MSU) hi anni awm e. Anni hian tan hma ngawr ngawr hi an duhlo a ni loa, traffic jam tih ziaawm tumna mai nia an ngaih avanga hetianga dodal hi niin sawi a ni.

Dodalna karah tan hma chu kalpui zel a ni a; nu leh pa/naupang ten buaithlak ti tak tak an tam hle. Buaithlak an tihna ki chu dik viau in lang mahse, in siamrem an tum loh avanga buai ta nia inngai hi a tam zawk anni in a lang.

*Nikum lamah Aizawl Municipal Council-ah councellor te lakah thil bawlhhlawh tak thlengin khua leh tui aia mahni tanghma ngai zawk nia ngaih theih turin sorkar lai paihthlak a ni a; hemi ang deuh tho hian boruak awm lehin a tira sorkar na siamtu bawk an sorkar ve leh!

Tichuan, tluang takin AMC chu a kal zel a; a hnuah remchan zawkna avangin Aizawl Municipal Corporation tia thlak a ni.

Aizawl chu Municipal Corporation a nih tak avangin Chairman chu Mayor tia sawi a ni ta a; Vice Chairman pawh Deputy Mayor tih a ni in Chief Executive Officer pawh Municipal Commissioner tih a ni ta bawk.

Tichuan, hun a kal zel a; AMC in term khat chu a hmang zo leh ta der mai. Hemi a nih avang hian inthlan thar leh a ni a; hetah hian MNF Seat 11 an la a, MPC leh MPCC tangdun in, seat 8 (MPC-1, MPCC-7) an la bawk.

Heti a nih avang hian Aizawl Municipal Corporation mayor atan PC Lalhmingthanga chu thlan a ni ta a ni. 10th. December a AMC hall-ah lak luh a nih naah Aizawl mayor thar PC Lalhmingthanga chuan, Aizawl Mayor atana thlan a ni chu lawmawm a tih thu sawiin, “Mipui sorkar, mipui huapzo kan kalpui dawn. Pathian hruaina hnuaiah councillor-te leh mipuite nena thawhhona ṭha tak nen Aizawl khawpui hmasawnna hi nasa takin kan thawh ka ring tlat a ni,” a ti.

*Thailand rama fiamthu lemchan thiam, Mizorama an lar em avanga ‘Khiangawia’ kan tih tak mai chu Mizo mipui ten kan en nasa in ‘Khiangawi – 4’ phei chu a part tin a hmuhnawm vek ni maiin a lang.

Naupang te pawhin an en nasain Khiangawia te pafa zain ‘Faina sabon’ tih an sak phei chu a lar zual hle. ‘Phaina babon’ an ti a; thenkhat phei chuan ‘Khiangawia en ang’ ti ta mai lo chuan ‘Babon khel ang’ an ti hial!

Tuna kan sawi lai (Khiangawia) Thai Comedian hi kum 1965 June 24 khan Yasothon Province, Thailand-ah lo piangin a hmingpum chu Petchtai Wongkamlao a ni a, Mum Jokmok leh Humlae hi a larpui zawk mah a; Mum Jokmok hi a stage name a ni.

Tunah hian nupui Endoo Wongkamlao neiin fa 2, Paytaai Wongkamlao (Khiangsata) leh Bussarakam Wongkamlao (Khiangvuanchiaii) te a nei a ni.

Tin, Mum Jokmok hian ama chanchin ‘The Untold Story’ tih chu a lo ziak tawh bawk.

*Bawngkawn Brigade rama BCM Bawngkawn Kohhran biak in sak, la luah fel chiah loh chu Bawngkawn mi nia hriat ṭhenkhatte’n lungawi lohna vangin an khawih a, bang leh tukverhte an vawm chhe nual.

Thu dawn danin, Brigade ram velah hian ram buai eng emaw zat a awm a; BCM Bawngkawn biak in sakna hmun pawh hi ram buaite zinga mi niin, biak in sakna lai hi Bawngkawn khawtlangin auditorium/hall sakna tura an ta neih ve tho a ni. Ram inchuh a nih avangin Court-ah pawh thubuai a awm mek a ni.

Aizawl District Magistrate thupek tarlan danin, BCM biak-in sakna hmun hi South Chaltlang V/C pass no.22 of 1973-in a huam chhunga mi a ni a, mahse, ram neih dan dik loa an ngaih vangin Bawngkawn khawtlangin an dodal mek a ni. Chutih laiin, Lushai Hills District (House Sites) Act, 1953 Section 2 angin, Village Council-in chenna in leh agriculture thil ni loa hmun a pek reng reng chu phal loh a ni a, tuna V/C pass awmte pawh a dik loa ngaih a ni.

Bawngkawn Baptist biak-in chungchangah hian Aizawl district magistrate, Dr Franklin Laltinkhuma chuan thupek a tichhuak a; Cr.PC Section 144 hmangin Brigade area-a BCM biak-in leh a bul velah mi tu pawh, phalna la hmasa loa kal phal a nih loh thu a puang a; he thupek hi Governor-in thla ruk chhung atan December 29, 2015 khan a pawtsei.

Hetianga Bawngkawn khawtlang (nia ngaih) te an che mai hi mipui dem an hlawh hle a; mimal in chu sawi loh, Pathian biakna meuh tihchhiat du tak mai chu mak kan ti tlang hle niin a lang. Hetih lai hian Hmar lama Baptist chep zia lam hawi zawnga ngaih theih tura thu sawi hriat tur pawh a awm nual.

An thu chu engpawhnise, Bawngkawn khaw mipui te hian khawtlang tan chuan Biak In meuh pawh an pawisa lo ngam hi an huaisen hle in a lang. Kan Kristian ramah Pathian rinchhana thinlunga hnaih tak tak siloa kan inngaidam ngawt ang an nih ve loh avang hian an fakawm letling hle.

*Minister of state Lal Thanzara chuan Chief Minister hnenah minister a nihna aṭanga bânna a thehlut a, Assembly Speaker hnenah pawh MLA a nihna aṭanga bànna a thehlut bawk. Heng banna a thehluh te hi pawm v eve anni.

Lal Thanzara hi Health & Family Welfare, Minor Irrigation leh Information & Communication Technology department-te enkawltu minister a ni a; chief minister Lal Thanhawla enkawl department-te a enkawlpui tel bawk.

A banna thehluh chhan hi Sunshine Overseas Company-ah share nuai Rs.40 /- neia, sumdawnna kal pui angin opp. MLA ten an puh vang a ni. Pu Thanzara chuan “Min puhnaah hian ka fihlim a ni tih lan chiantir thei bertuah ka ngaih avangin bànna hi ka thehlut a ni,” a ti a, chhui chian a nih theih nana bang a nih thu a sawi bawk.

Thla hnih vel a chawlh hnuin by-election hmanga thlan tlin leh a ni a; hetah thung chuan Cabinet Minister a tling chho hlauh ta zawk a ni.

*Dist paruk-a VC leh Aizawl khawpui Local Council inthlanna chu tluang taka neih a ni a; Aizawl Dist chhunga Village Council 69 inthlanna neihah Congress Party in Village Council 28 an la a, MNF in 26, Independent in VC 6, ZNP in VC 1 leh BJP in VC 1 bawk an la a, Aizawl Dist Village Council inthlannaah hian chak bik awm lohna VC 7 a awm a, chungte chu Darlawng, Lailak, Melriat, pehlawn, saitual III, Sesawng leh Sihphir te an ni.

Aizawl Municipal Council huamchhunga Local Council 82 ah chuan Congress Party in Local Council 39 an la a, MNF in MPC nen an thawhdunna 1 telin Local Council 39 tho an la a, chak bik awm lohna Local Council 3 a awm a, chungte chu Thuampui, Republic, Leh Lawipu an ni a, Independent-in Tuithiang Local Council an la thung a ni.

Aizawla Local Council leh District dang panga – Aizawl, Serchhip, Champhai, Mamit leh Kolasib a V/C inthlannaah hian Mizoram Peoples Forum te chuan mawhphurhna lain, vote thlak tura kalte an lo buaipui a, Lunglei District bikah chuan YMA ten mawhphurhna la in boruak pawh a muanawm hle a ni.

Tun tumah hian Aizawl khawpui chhunga Local Council 82 ah inthlan a ni a, Dist. 6-a VC 498 ah inthlan a ni bawk. Tun tum LC leh VC thlanah hian seat 2,817 a awma, candidate 7,129 an awm. Seat 2,817 zinga 743 chu hmeichhe tana hauh a ni a, hmeichhe candidate zat chu 1,783 an ni.

* McDowells No 1 Soda Mizoram Premier League final-ah champion lai Aizawl FC leh MPL 2 champion Chanmari FC-in an khel a, 3-0 in Aizawl FC an chak a, a zawna a champion hmasa ber leh tum hnih champion thei an ni.

Final-ah hian Aizawl FC Liberian striker Alfred Kemah Jaryan chuan goal hnih thunin Brandon VL Remdika’n goal khat a thun ve bawk.

Aizawl FC hi hian 2016 session –ah a hmasa ber atan I- League khel turin an in pet tling bawk a; Mizoram team atanga I- League khel tura inpet tling masa ber anni.

Aizawl FC hi 1984 kuma ding tan a ni a; Pu Robert Romawia Royte chu club neitu a niin an team coach chu Manuel Retamero Fraile (Spannish) a ni.

* Mizo Idol, 2015 chu tluangtaka neih leh a ni. Mizo Idol-a tel tur hian form la chhuak 900 chuang an ni a, heng zinga mi 644 ten an thehlut a, thehlut zingah hian AIR artist leh tunhnaia Cable TV-a zai intihsiaka top 10-a tling, Elimination paltlang ngai lo 13 an awm a, Mizo Idol Contest, 2013-a top 50 tling chin Third Round intihsiak aṭanga tel tur 8 an awm bawk. Eliminitation Round-a intihsiak hi an vaiin mi 623 an ni.

Rebecca Zorintluangi, Sairang Sihhmui chu a thiam bera thlan a ni. Pakhatna Rebecca Zorintluangi hian pawisa faiin Rs. 52,000/- a dawn bakah, thla tin Rs. 4000/- in thla 12 chhung pek a ni bawk dawn a, hei bakah hian D3 Business Enterprise, Ramhlun North chuan LG Home Theatre System an pe a, Solar House, Mission Vengin Solar Inverter (Home Lighting System) full set leh DTH Lifetime an pe bawk.

Idol trophy hi idol nilai Grace Lalchhanhimi’n a hlan. Rebecca Zorintluangi hi kum 19 mi a ni a, Thangchungnunga fanu a ni. Tunah hian Pachhunga University College-ah BA a zir mek. Kum 2008-a Little Zo Star Singer buatsaih a nih ṭum khan palina a lo thleng tawh a ni. Mizo hlaa a duh ber chu ‘Lungngaih ni leh lawm lai niah hian’ tih hla a ni a, sap hlaa a duh ber chu ‘Temporary Home’ a ni.

Hetih lai hian LPS lam pawhin Comedian search an huaihawt leh a; hetah hian John Lalthakima Durtlang chu pakhatna a ni .

1st. Friday: Kumthar ni a ni a; Mizo mipui tam ber chuan kumthar ni chu hlim takin an hmang.

2nd. Saturday: Mizorama kohhran hrang hrang te chuan 2016 kum thar lawmna ruai an ṭheh. Thenkhat nimin lama theh zawk an awm nual laiin nimin lam pawha theh, vawiin lama nawn an awm nual bawk.

3rd. Sunday: Central YMA hnuaia SRS duty-te chuan Lalzawmthangi, Zawlzau, Zemabawk leh Lalthansanga, Tuirial Airfield nia insawite hnen aṭang¬in heroin hawng hnih leh can riat an man. Heroin an mante hi tualchhunga hralhna angin Rs. 1,30,250/- hû a ni.

4th. Monday: India hmarchhak state hrang hrangah magnitude 6.8-a náin lîr a nghîng a; a nghin ṭanna Manipur-ah thi leh hliam eng emaw zat awm mah se, Mizoramah chuan thil tihchhiat a neih hriat a ni lo. Lirnghing hian Mizoram pum sawiin, a nat ber tum leh a rei ber tum mah nise thil pawi a neih hriat a ni lo.

5th. Tuesday: Central YMA pisa chu kum 2016 atan hawn ṭan a ni. Office hawn ṭan ni hian thawktute inhlan tharna hun hman nghal a ni a, CYMA general secretary Lalhmachhuana’n kaihruaiin, vice president Vanlalruata leh treasurer J Lalsailova ten fuihna thu an sawi.

6th. Wednesday: Kum 2013 Assembly inthlanpuia MNF candidate-te’n electronic voting machine (EVM) chungchanga Gauhati High Court-a thubuai an thehluh chu High Court-in a hnawl hnuah, EVM-a vote tla zat inziak lut chu Election Commission of India thupek angin nawh reh a ni. EVM-te chu strong room aṭanga la chhuakin, a dahna tur siam pindan dang (primary warehouse)-ah dah luh nghal a ni. Strong room hawnnaah hian political party tin aiawhte an tel.

7th. Thursday: West Phailengah Malsawmpekhlua (4) s/o Lalṭhazela, West Phaileng khawlai lêng chu silaia kah a ni a, damdawi-in thlenpui a nih hnu lawkah a thi. Lalfakawma, fapa naupangin a pa silai, a mu awm sa chu lo lek chhuakin he thil pawi hi a thleng ta mai niin an sawi.

8th. Friday: Zokhawthar leh Aizawl inkara tlan maxicab MZ-01 J-9782 chu Keifang aṭanga Seling thlen hma, Custom checkgate bulah chesualin kawng thlangah a lum a, mi paruk an thih bakah, mi dang pariat an hliam. Maxicab-ah hian a khalhtu Lalchhanhima (23), Hruaikawn Khawthar bakah mi dang 13 an vaiin mi 14 an chuang a; motor hi kawng thlangah metre 100 vel a lum a ni.

9th. Saturday: Mizoram Premier League champion Aizawl FC-in 2015-16 season I League opening match an khel a, champion lai Mohun Bagan khelmualah 1-3 in an tlawm.
10th. Sunday:Mizoram UPC Sunday School Day a ni a; Hemi pual hian General Sunday School Chairman, Rev C.Lalremsanga chuan Headquarter kohhranah day thuchah a sawi. Heng bakah hian rampumah tualchhung lama naupang leh puitling te inkhawm fin chuan day pual thuchah te ngaithlain hemi nia thawhlawm an lakkhawm hi day pual turin an ruahman bawk.

11th. Monday: Missionary Day a ni a, sorkar chawlh a ni. Mizorama missionary hmasa ber Sap upa leh Pu Buanga ten kum 1894-a Sairang thlang, Changsil kàia Mizoram leilung an rah hmasak ber champha, Missionary Day hi Baptist Church of Mizoram-te chuan an tualchhung kohhran ṭheuhah an lawm a ni.

12th. Tuesday: DIET, Aizawla Faculty-te chu India ram hmun hrang hranga DIET-te tlawha Faculty Development Tour nei turin Aizawl an chhuahsan. Aizawl DIET hian India chhim lama DIET hrang hrangte an tlawh dawn a; nikum lam khan Kerala DIET pahnihte pawhin Aizawl DIET hi an rawn tlawh tawh a ni.

13th. Wednesday: Saiha College building sak lai, mamawhna vanga luah luh tawh chu a satu contractor-in khârin, kawngkhar zawng zawng tala-in a kalh. Saiha College building satu contractor Laibi Chozah-in a kalh chhan hi, a sakna man (bill) lak tur, Rs. 9,40,000/- vel a lak theih loh vang a ni a, a hmain bill pek thuai a nih loh chuan college building chu kalh a tum thu, Saiha College principal Dr R Hmingthanzuala leh zirtirtu dangte a lo hrilh tawh a ni.

14th. Thursday: Zoram Nationalist Party-in kum 2016 atana an party pisa hawnna inkhawm an neiha, he hunah hian ZNP president Lalduhoma chuan, “Sorkar theia kan rin ni loin, sorkar atana kan duh tihchak nachang hre tawh ila” a ti.

15th. Friday: Serchhip district-a Fisheries department chuan Serchhip IPR conference hall-ah NLUP third phase leh fourth phase-a ṭanpuina dawng turte pualin training an buatsaih. Training-ah hian sangha dil siam dan leh enkawl dan te, sangha no tam zawk thar theihna tura sangha tui tir dante a lem nen an zirtir a ni.

16th. Saturday: Kolasib Lok Adalat chu Kolasib Disrict Court-ah an ṭhu a, thubuai 12 ngaihtuahin, pasarih an chingfel. Thubuai an chinfelah leiba ṭhìnna aṭangin Rs. 29,450/- an hmu chhuak a ni.

17th. Sunday: Vairengteah sipai leh khawtual mi an intibuai. Vairengte mi pali, auto-rickshaw hmanga IOC Veng aṭanga an léng haw chu sipai gate-a duty-in a lo au a, anni pawhin an au let ve a, an buai zui ta nia sawi a ni.

18th. Monday: Mizo Students’ Union (MSU) leh an thawhpui pawl ṭhenkhatte chuan Persons with Disabilities (PwD)commissioner B.Sairengpuii pisa kai tur chu Chaltlanga a pisa kawtah an dang. B.Sairengpuii pisa kai tur an dan chhan hi sorkar aṭanga a pension hnua sorkarin PwD commissioner atan kum thum chhung atana a ruatna a tawp tawh hnuah, kum hnih dang, kum 2017 thleng commissioner ni tura a dah nawn leh vang a ni.

19th. Tuesday: AH&Vety department chuan Lungleia an complex-ah NLUP hnuaia ar leh vawk vulh thlangtu, Lunglei East leh Lunglei West cluster-a chhungkaw 43-te hnenah NLUP second phase final instalment an sem a, Rs. 1,22,78,650/- an sem ral.

20th. Wednesday: Prominent journalist Robert Lal Chhuana h/o Christina Hmingliani chu Sihphira an chenna inah lung (heart) ná vangin a thi a, vuiliam nghal a ni. March 30, 1939-a piang Robert LalChhuana hian kum 1973-ah ‘Hruaina Eng’ chanchinbu a chhuah a, September 1, 1973-ah ‘Romei’ chanchinbu siam lehin, hei hi a thih thlengin a enkawl zui a ni. Mizoram Journalist Association-ah term sarih chhung president a ni a, MJA-in March 19, 2008-a prominent journalist a puan hmasak ber mi pathum zingah a tel. Prominent journalist hi kum 30 chhung chatlak loa chanchinbu enkawl tawh leh kum 60 tling tawhte hnenah chauh hlan ṭhin a ni.

21st. Thursday: Bairabi-a Ch.Chhunga leiletah Assam Forest leh Police-te’n leileta hnathawkte tibuaiin an ûm darh a; thil thlen dan a hmuna enfiah tur hian MZP hruaitute’n Bairabi hi an pan nghal.

22nd. Friday: Persons with Disabilities (PwD) commissioner B.Sairengpuii bân phûtin Vanapa Hall kawtah Mizo Students Union (MSU) huaihawtin zirlaite an pungkhawm a; B.Sairengpuii chu Mizoram sorkarin PwD commissioner atana a ruat nawnna thupek (order) a sût avangin buaina awm loin zirlaite chu chawhma dar 11:15 velah an ṭin. Zirlai pungkhawmte chuan resolution point pathum an pass nghal.

23rd. Saturday: Project Pushpak chuan Republic Day lawmna leh ram leh hnam tana inpekna kawnga infuih tharna atan Mini Maration ‘Run for India’ an buatsaih. Marathon-a telte hi chief secretary Lalmalsawma’n Lammual aṭangin a vai liam a, Lammuala an lo let leh hnuah lawmman dawngtute hnenah Sports minister Zodintluanga’n lawmman a hlan. Mini Marathon intihsiakna hi category panga-ah then a ni a, mipa leh hmeichhiate tan kum 14-18 leh kum 18 chung lam tan intihsiakna a hranga buatsaih a ni. Mipa leh hmeichhe naupang kum 14 hnuai lamte erawh chu a huhoa intihsiakna neihtir a ni thung. Intihsiaknaah pakhatnain Rs. 3,000/- pahnihnain Rs. 2,000/- leh pathumnain Rs. 1,000/- an dawng.

24th. Sunday: Kristian Ṭhalai Pawl (KṬP) ten January 22, 2016 aṭang a pastor bial hrang hranga Bial Conference an hman chu a ṭiak.

25th. Monday: Governor Lt.Gen. Nirbhay Sharma chuan Former Legislators Association of Mizoram (FLAM) hruaitute a office conference hall-ah a kâwm. Governor chuan, FLAM hruaitute chu Mizorama an lo dawnsawn danah lawmthu hrilhin Mizoram hmasawn nan thawhpuiah a sáwm a, FLAM president KL Rochama pawhin thu sawiin, “Governor taima leh viak ṭha tak mai, Mizoramin kan nei hi a lawmawm hle,” a ti.

26th. Tuesday: India ram hmun dang rualin Mizoram hmun hrang hrangah Republic Day vawi 67-na hman a ni a; district headquarters pasarihah chuan district bawrhsapte khuallian niin, hnam puanzar an pawt pharh. India rama a lawman pui ber New Delhi-ah chuan prime minister Narendra Madi chuan naupang huaisen chawimawina dawng tura thlan mi 25 hnenah National Bravery Award a hlan a; award dawngtute zingah Ramdinthara (16) s/o VLMS Dawngliana, Saiha Vengpui a tel.

27th. Wednesday: MJA general headquarters chuan Aizawl Press Club-ah inhlan tharna leh kum thar thingpui inhona hun an hmang a, member-te an tel ṭha hle. Inhlan tharna hun hi MJA treasurer R.Lalhmangaihzuala’n a kaihruai a ni.

28th. Thursday: Hrangbana College chuan an college-ah blood donation camp an huaihawt a, Aizawl Civil Hospital tan thisen unit 124 pein, a petute mipa 98 leh hmeichhia 26 an ni.

29th. Friday: UD&PA department leh Lengpui Branch YMA ṭangkawp chuan Lengpui Airport-ah ‘Clean My Airport’ programme an hmang a; Lengpuia YMA member-te bakah high school leh middle school zirlaite’n airport leh a chhehvel tifaiin a hnatlang a ni.

30th. Saturday: Range Officer Sairang Forest Range, Pu Rongura Hrahsel Quarters-ah, Association for Environment Preservation (ASEP) leh Sairang YMA Branch pangate tangkawp chuan Bairabi atanga Sairang rail kawng (New B. G. Railway Line) sial avanga sava leh ramsa tenau chenna tihchhiat sakte tana mihring siam chawp chenna In tlangzarhna hun Release of Alternative Habitat/ Home for Avifauna an hmang. Hnatlanga thawkchhuakte hi pawl ngaah inthenin Sihhmiu atanga Pualhrang thleng an feh chhuak a. Ramsa tenau leh sava bute hi Wooden Plank cabinet, mau, plastic pangpar khawina pot, artificial leh hollow cavity (thing khawro) atanga siamte an ni.

31st. Sunday: West Lungdar khuaah Lalrindika (25) s/o Lalchhunga chuan Vanlalhruaia (35) s/o Lalkailiana chu ulhbunin a kâp hlum. Lalrindika leh Vanlalhruaia te hi pate unau an ni a, Lalrindika te inah an inhnial buai a, Lalrindika chuan a kâp ta mai a ni. Lalrindika hi police-in an man nghal.

1st. Monday: Lunglei DC thar Abhijit Vijay Chaudhuri, IAS chuan a hna thar a zawm a, DC office thawktute kâwm nghalin, fuihna thu a sawi. Abhijit Vijay Chaudhuri hi IAS (AGMUT Cadre) 2012 batch a ni a, October 2014 aṭanga January 2016 thleng khan North Vanlaiphai SDO(C) hna a chelh a ni.

2nd. Tuesday: Lunglei khawpui chhunga Falkawn bul khâmah Lalrinmuani (33) d/o K Remsangi, Lunglei Salem Veng thia chhar a ni.

3rd. Wednesday: Dr. Rosy Lalmalsawmi Ngente lehkhabu ziah ‘Aigupta Ramah Chhungkaw Thianghlim’ tih chu Aijal Club-ah Lalrammawia Ngente in a tlangzarh.

4th. Thursday: National Programme for Prevention & Control of Cancer, Diabetes, Cardiovascular Diseases & Stroke (NPCDCS) leh National Programme for Prevention and Control of Deafness (NPPCD) buatsaihin Chanmari YMA Hall-ah World Cancer Day hman a ni a; Health minister Lal Thanzara khuallian a ni. Health Minister chuan, Mizote zinga cancer a hluar lutuk chu ṭan tlân chuan tihtlem theih a nih thu sawiin, “Cancer hi a tìr têa hmuh chhuah a nih chuan 90% enkawl dam theih a ni. Mizoram mipui nunna suattu ber cancer hi thlir liam mai loa a do nan leh a tihkiam nan theihtawpa ṭan tlan a ngai a ni,” a ti. World Cancer Day pual hian inkhawm zawhah NPCDCS leh NPPCD ten a thlawna inentirna, Special Non Communicable Disease (NCD) Clinic an buatsaih a ni a, Chanmari veng mi eng emaw zat an inentir a ni.

5th. Friday: Mizoram police leh Central YMA hnuaia SRS duty-te chuan Zokhawthar aṭanga Aizawl rawn pan maxicab, MZ-01 D-0350 lo chhuk chu Bawngkawnah report an dawn avanga lo dapin heroin hàwng 9, Rs. 4,05,000/- hû leh a neitua puh David Lalremruata (24) leh Goldena (22), Zokhawthar nia insawi ve vete te an man nghal.

6th. Saturday: MIFCO chairman PC Zoram Sangliana, MLA chuan Chhingchhipa MIFCO sapthei herna hmun a tlawh a, loneitute nen an inkâwm nghal. PC Zoram Sangliana chuan, sapthei chìn chu eizawnna ṭha tak nia a hriat thu sawiin, “Ram dang aṭanga leina tur man zat rawn bituk tawh lo a, a thar chhuaktute ngeiin an duh zat an chhiar ngam theih nan tun aia nasa zawka ṭan lak a ngai. Loneitute’n an thar chhuah aṭanga hlâwkna an sên hi kan duh ber a ni,” a ti.

7th. Sunday: Synod Mission Board (SMB) chuan Bawngkawn Kohhran biak-inah missionary a lak thar mi 104-te tirh chhuahna inkhawm a buatsaih. Inkhawm hi SMB secretary Rev. K Lalrinmawia’n a kaihruai a, SMB coordinator Dr Robert S.Halliday-a’n missionary kal chhuak turte chanchin a sawi a, Synod moderator Rev. H Lalrinmawia’n tirh chhuahna hun hmangin, thuchah a sawi. SMB hnuaia field hrang hrang 19 atana missionary lak tharte hi mipa 44 leh hmeichhia 60 an ni.

8th. Monday: Ralkapthanga, Buarpui, Lunglei district chu a thing kihin a vua a, damdawi-in panpui a nih laiin a hliam tuar loin a thi. Ralkapthanga hi an biak-in bula kohhran hnatlangah a tel a, biak-in bula thingkung kih an tumna lamah an thing kih chuan a vaw palh a ni.

9th. Tuesday: Transport minister John Rotluangliana chuan Bairabi leh Lumding, Assam inkara rel kawng zauh meka hnathawh dan a en a; Railways hotute chuan March 2016 chhunga an zawh hman tur thu an lo hrilh. Transport Minister hi chief secretary Lalmalsawma leh Transport secretary Hrangtawna ten an ṭawiawm.

10th. Wednesday: Pu R. Lalzirliana, Prisons Minister chuan Lawngtlai District Jail a tlawh a, hnathawktute leh Jail tang mekte a kawm. Minister chuan District Jaila tang mek te chu, Ram leh khawtlang duhloh zawng engemaw thil an tihpalh avanga tang an nih thu a sawi a. Amaherawh chu chutiang mi ni reng lova, khua leh tui tha, ram leh khawtlang tana mi tangkai leh mi dangte tanpuitu ni tawh zawk turin a fuih.

11th. Thursday: Eptu MLA te chuan an leader Vanlalzawma hoin Aizawl Civil Hospital leh State Referral Hospital tlawhin, damdawi-ina hmun hrang hrangte an enfiah. Eptu MLA-te chuan sorkarin State Refferal Hospital tihchangtlun a tum dan leh Aizawl Civil Hospital tihtêt a tum chu an duh loh thu an sawi.

12th. Friday: Mizoram Government Drivers’ Association (MGDA) chuan Synod Conference Centre-ah conference an hmang a, chief minister Lal Thanhawla’n a hmanpui. Chief Minister chuan, driver-te an pawimawh thu sawiin, “In kutah mi nunna a awm tih hrereng chungin fimkhur a ṭulzia theihnghilh suh u. Hun kal tawh thlirletin tunah chuan hma in sawn nasa hle tawh tih a hriat a, inthlahdah tawk la awm bawk mah se, thil duhawm lo hriat tur a tlem ta hi a lawmawm hle a ni,” a ti. MGDA inkhawmpuiah hian chawhnu lamah ro an rel bakah, hruaitu thar an thlang a ni.

13th. Saturday: Aizawl Municipal Corporation hotute leh Aizawl traffic police hotute chuan Bazar Bungkawna kawngpui chunga kea kalna tur siam mek an enfiah. Bazar Bungkawna pedestrian over-bridge hi kawngpui lunlai leh lirthei tamna hmun a nih avangin kea kalte’n kawngpui an kân awlsam zawk nan leh mipui him zawkna tura siam a ni a; AMC sum Rs. 50,11,000/- hmangin North East Consultancy Services-in an siam a, September 27, 2016-a zawh hman tura ruahman a ni.

14th. Sunday: Mizoram Presbyterian Kohhran Hmeichhia, pastor bial hrang hrangte 12th. February zana tan chu a tiak ta.

15th. Monday: Sangau-I V/C leh YLA-te chuan Sangau leh Pangkhua ram chhunga Chhimtuipui lui, Saisihchhuah bul vela sangha leh luia nungcha an humhalh huam chhunga bomb hmanga sangha mantu, Kapthangliana, Sangau-I leh Kithanga, Pangkhua ten sangha an man sa an mansak chu an hal ral. Sangha an hâl ral tâk hi tualchhunga an hralhna anga chhûtin Rs. 20,000/- man vel a ni a; Sangau-I V/C leh YLA-te chuan Kapthangliana leh Kithanga te chu Rs. 20,000/- ve ve chawi turin an ti bawk.

16th. Tuesday: Kristian Ṭhalai Pawl din champha, KṬP Day a ni a, hmun hrang hranga KṬP branch-te’n an remchan dan angin an hmang. KṬP Day hi nikum thleng kha chuan February 22-ah hman ṭhin a ni a, Synod Inkhawmpuiin KTP Day chu February 16 a nih thu a puan hnuah, kumin aṭangin February 16-ah an hmang ta a ni.

17th. Wednesday: Kawnpui leh Khamrang inkara Tuitun lui bulah truck MZ-01 J-2766 leh 10 Assam Rifles 407 truck intáiah AR sipai pakhat Marru Gongo (32) chu a thi. Midang pathumin hliam an tuar bawk.

18th. Thursday: Mizoram Ṭhalai Kristian Pawl (MṬKP) inkhawmpui vawi 46-na chu CYLA playground, Lawngtlaia pandal-ah ṭan a ni. MṬKP inkhawmpui hian February 21, Pathianni zan thleng a awh dawn a, thupui chu ‘Mamawh chhanna Isua Krista’ tih niin, mi hrang hrangin thupui hi an sawi ang.

19th.Friday: Mizo pipute huna hmun pawimawh, Hringlang Tlang chu sorkarin District Park-ah siam a tum a, hmalak dan tur sawihoin Champhai bawrhsap Vanlalngaihsaka hoin DC Conference Hall-ah mi pawimawhet an ṭhukhawm. Hringlang Tlang hi Champhai aṭang km. 22-a hlá, Mualkawi khaw bula awm a ni.

20th. Saturday: Governor Lt.Gen. Nirbhay Sharma leh Indian Air Force (IAF)-a air vice-marshal OP Tiwari te chu Raj Bhavan-ah an inkâwm a; IAF hnuaia hna chi hrang hranga Mizo ṭhalai tam zawk an luh theih dan tur an sawi dun.

21st. Sunday: Baptist Church of Mizoram chuan Education Sunday an hmang a, tualchhung kohhran tinah chawhma inkhawmah hun an hmang a, thupui chu ‘Thu ka pek zawng zawng che u pawm turin zirtir rawh u’ tih a ni. BCM Education Sunday hi February Pathianni hnuhnung berah hman a ni ṭhin a, kuminah erawh chuan Pathianni vawi thumnaah an hmang a ni.

22nd. Monday: Sericulture department chuan Hnahthial bazarah NLUP ṭanpuina an sem. NLUP third phase fourth instalment-ah mi 11 hnehah Rs. 10,915/- ṭheuh leh fourth phase second instalment-ah mi panga hnenah Rs. 19,800/- ṭheuh sem niin, Rs. 2,19,065/- sem ral a ni.

23rd. Tuesday: India sipai, ramri vengtu Border Security Force (BSF) leh Bangladesh sipai, ramri vengtu Border Guards Bangladesh (BGB)-te chuan Tlabung bulah ramrîa inkalpawhna khàn an en ho bakah, ram leilung nihphung an zirho. ‘Joint Recce’ tia vuah ram pahnih sipaite’n ramri dinhmun an enhonaah hian BSF leh BGB sipai hotute an tel a; tun dinhmuna thawhhona ṭha tak an nei chu lawmawm an tih thu leh chhawm nun zel ṭul an tih thu an sawi. Joint Recce-ah hian BSF lam chu DIG pahnih – UPS Pathania leh SC Budakuty ten an ho a; Bangladesh lam aṭangin BGB commanding officer pathum, sector commander pahnih leh JCO pahnih an tel. He Joint Recce hian chawlhkar khat a awh ang.

24th. Wednesday: Excise & Narcotics department (END)-a Anti-Narcotics Squad chuan Upper Republic-ah heroin gram 19 leh a neitua puh David Zonunmawia (34) s/o Kaphnuna, Upper Republic nia inchhál an man.

25th. Thursday: AH&Vety department chuan Chhiahtlang community centre-ah Awarness Campaign cum Animal Health Camp an buatsaih a, ran hriselna endik a nih bakah, Vety doctor-te’n ran vulh tura thil pawimawh hrang hrangte mipuite an zirtir.

26th. Friday: Isaac Mawia (38), Lungphun khua, Sihphir Venghluna khawsa mek chu Sihphir Mêl 9-a bawlhhlawh paihnaah thia hmuh a ni. Isaac Mawia hi February 24 zân a a chhuak a lo haw leh lo a ni, khawtlangin zawn tuma an thawhchhuah hmasak ber niah an hmu nghal a ni.

27th. Saturday: Mizoram Science, Technology & Innovation Council (MISTIC) bultumin Vanapa Hall-ah National Science Day 2016 lawm a ni a, Planning minister Lalsawta’n a hmanpui. Lalsawta chuan, ni tin khawsaknaah awlsam, rang leh hlâwk zawka hna thawhna atan science chhawr ṭangkai a pawimawh tih a sawi a, “Hmasawnna kawnga pên thum pên turah hmanrua leh khawl ṭangkai siam chhuah hi pên khatna a ni. A chhawr ṭangkai thei tur mipuite hnena thiamna hlan chhawn a, chuta tanga an thil siam chhuahte deh ralna tur lam buatsaih chu ke pên lehna tur a ni,” a ti. India scientist Sir CV Raman-a’n February 28, 1928-a Raman Effect a hmuh chhuah ní hriat reng nan, kum 1987 aṭang khan February 28 hi National Science Day-ah hman ṭhin a ni a; kuminah chuan February 28 hi Pathianni a nih avangin vawiinah hman a nit a a ni.

28th. Sunday: Baptist Church of Mizoram (BCM) chuan Lunglei Zotlang BCM biak-inah probationary pastor atana an lak thar mi pariatte lak luhna inkhawm (induction service) a buatsaih, Pro. pastor tharte hi BCM general secretary Rev. H.Lianngaia, presiding minister atana ruatin a la lut a; Christian Education director Rev. V.Vanlalchhunga’n a ṭawngṭaisak a ni.

29th. Monday: ZNP vice president K.Liantlinga leh ZNP-a a thurualpui mi ṭhenkhatte chuan MNF party an zawm a, Mizo Hnam Runah anmahni lawmluhna inkhawm neih a ni. K.Liantlinga chuan, “Vawiin hian Mizo nationalism tihlawhtling turin kan inpuiah kan lo hâwng a ni,” a ti. ZNP hruaitu, MNF party zawm tate zingah hian ZNP Political Affairs Committee (PAC) member leh general secretary R.Vanlaltluanga, general secretary dang pahnih, secretary panga leh ZNP ṭhalai vice president K.Ramsangzuala bakah, mi dang 170 vel an tel.

Mizoram khawpuiah-te hian kangmei a chhuahin kangthelh pawl-ten theihtawp chhuahin tan anla thin. Chutih karah chuan harsatna namenlo an tawk thin bawk. An harsatna tawh ber nia ka hmuh theih mai chu tui lakna remchang fire hydrant a awmlo leh kawng chep lutuk hi a ni fo. An tuipai tlemte a zawh chuan chawi leh chawp mai loh chu tih theih an nei tlem khawp ang; an thiamna an hmang theilo a ni ber.

United States -ah ngei pawh hian khaw thenkhat fire hydrant awmlohna a awm ve nawk tho mai. Chutiang hmunah chuan “portable collapsible tank” an tih mai (tuikhuah thleh theih ti ila kan sawi sual lovang) chu an hmang tangkai em em thin. Kangthelh motor chuan kang a thelh chhungin a dangin tui anlo chawi a, chumi, tuizem thlehtheih kaihparhah chuan an rawn chhunglut zung zung a, kangthelh motor la awm khan chhumlo chatlo-in kangmei tihmih hna chu a thawk thin a ni.

Hetiang, “portable collapsible tank” ang hi sawrkar department a nei tur chuan thil a kal zung zung theilo maithei, mahse khawtlang, entirnan, YMA branch tinte hian pakhat emaw theuh tal neita ila (mahni siamchawp pawh nise), kangmei a chhuah apiangin kangthelh motor hman theihna turah kuai parhin khawtlang chuan tui chhunluh hna thawkta thin ila, kangthelh motor pawhin tui chawi sek ngailo-in hna an thawk zung zung thei zawk ngeiin ka ring a ni. Kangthelh mi tho ka ni a, ka hmuh leh tawnhriat atangin ka ram, Mizoram tan thatur nia ka ngaih ka rawn sawi a ni e.

Ka sawi ang chi chu Google atanga ka hmuh hmasakber link ka rawn chhawp tel e.

1st. Tuesday: Commercial Vehicle Joint Action Committee (CVJAC) bultumin Mizoram pumah lungawi lohna lantirna atan sumdawnna lirtheite an tlan loa, chief secretary Lalmalsawma nen an inbiak hnuah lungawi lohna lantir hi an ti tawp. CVJAC-te hian chhiah pek dan tur te, bus leh taxi replacement tih theih loh te, chhiah tihsan a nih laia taxi intlan chhawk tura tihte leh emergency thila road permit lak ngai lo tura tih ziak dahte an phut a, an thil phut chungchangah hian sorkar chu inbiak duh loa an puh a ni.

2nd. Wednesday: Aizawl Municipal Corporation (AMC) Board of Councillor (BoC) chu an ṭhukhawm a, kum 2016-2017 atana AMC budget tura ruahman vbc. 31.01/- pharh a ni. Sum hmanna tura ruahman a nih dan chuan vbc. 16.57/- chu AMC inrelbawlna leh thawktute hlawh tur a ni a, vbc. 14.44/- chu hmasawnna hnathawhna tur a ni.

3rd. Thursday: General Conference vawi 56-na chu New Champhai khelmuala pandal-ah ṭan a ni a, palai lawm inkhawm neih a ni. Inkhawm hi Central KṬP leader Rev. J.Lalremsiama’n kaihruaiin, Synod moderator Rev. H.Lalrinmawia’n thuchah a sawi a, general secretary Upa Zonunmawia’n report a pe. Synod Choir music video album ‘Lal a ni’ tih tlangzarh nghal a ni.

4th. Friday: Chapchar Kût chu Mizoram hmun hrang hrangah hlim taka hman a ni a, a hmanna pui ber Aizawlah chuan Lammualah Home minister R.Lalzirliana hoa hman a ni. Lammuala Chapchar Kût hmannaah hian Art & Culture minister R.Romawia chu Kût Thlengtu a ni a, Home Minister chu Kût Pa a ni. R.Lalzirliana chuan Chapchar Kut chu pipute nunze mawi tlawmngaihna leh aia upate zahna Mizo thinlungah par chhuah tir lehtu nise a duh thu sawiin, kut hmangtute chu innghirhona tel loa, induhsak tawnna nen hlim taka hmang turin a chah. Lammuala hun hman a nih bakah Chapchar Kut pual hian Assembly Annexe-ah flower exhibition, Vanapa Hall-ah photo & painting exhibition leh Lammualah handicraf/handloom & food exhibition buatsaih a ni bawk.

5th. Saturday: MZP bultumin Zoram Ni pualin Aizawlah Millenium Center aṭanga Vanapa Hall thleng kawng zawh a ni. Kawng zawh ṭanna Millenium Centre kawtah MZP president Lalsangzuala Ngente-in thu a sawi a, “Zoram Ni hi tute mah, political party leh eng pawl mah tih thinurna atan leh tute tan emaw rilru nat tharna atan hmang kan ni lo,” a ti. MZP chuan March 5, 1966-ah India sorkarin jet fighter hmangin Mizoram a bomb nia sawiin, hemi ni den chhen hian March 5 chu ‘Zoram Ni’ tia vuahin, he ni pual hian kum 2008 aṭang khan hun an hmang ṭhin a ni.

6th. Sunday: UPC North East India, North Mizoram District Conference, March 3 aṭanga Tlangnuam playgorund-a neih chu a ṭiak. Inkhawmpuiah hian pastor lak thar tur nupuite chuan hna nghet an nei tur a ni lo, an ti. Conference-ah hian thupui ‘Hma i sawn zel ang u’ tih chu Rev. C. Lalrammuana, Rev. C. Lalmuanpuia, Rev. Laltluanga, Rev. Zohmingthanzama, Rev. Rosanga Kawlni leh pastor Vanlalruatate’n an sawi.Kum 2016 – 2017 chhunga hruaitu tur an thlang nghal a, district superintendent-ah Rev. C Lalrammuana, secretary-ah Rev. Laltluanga leh secretary-ah Rev. Chhiarpuia te an thlang.

7th. Monday: Minister C.Ngunlianchunga chuan Lawngtlai khaw chhunga 33Kv Sub-Station thar sakna hmun tur a tlawh. 33 Kv Sub-Station thar hi tuna P&E Complex chhungah dah tum a ni a, hna pawh thawh tan mai theih tura inlakkhawm mek a ni.

8th. Tuesday: Mizoram Governor Lt Gen. Nirbhay Sharma (Retd.) chuan Raj Bhavan, Mizoram website siamthat, rajbhavan.mizoram.gov.in chu internet kaltlanga en theih in a hawng. Website hawnna-ah hian Governor chuan Mizo thalai ten Information Technology Age ah midang te rual in hma an sawn tih a sawi a. Midang te aia thiam tur erawh chuan hmabak an la nei tih sawiin “Raj Bhavan Website pawh hi Information Technology huang chhunga hmasawn mek Mizo thalaite zawng zawng Raj Bhavan in a chhuangin a thlawp tlat tih lan tir nan siam a ni a. Smart India boruak lo awm mek ah hian Smart Mizoram bakah smart office te kalpui tum ila, Mizoram ah digital connectivity tha zawk a lo awm hunah Mizo thalai ten hlawkna kawng tam takah an nei ang” a ti.

9th. Wednesday: Lei leh ni inkarah thla a awm avangin awkin ni a lem. Mizoramah chuan a puma hmuh theih a ni lo a; zing dar 5:33 aṭanga zing dar 6:52 thleng a hmuh theih. Pacific thliarkar, Sumatra thliarkar, Indonesia leh a chhehvel rama chengte chuan ni awk lem hi a pumin an hmu thei thung.

10th. Thursday: Sorkar laipuia minister of state for Defence Rao Inderjit Singh chuan National Cadet Corps (NCC) hmeichhiate khawvela tlang sang ber Mount Everest-a lawn turte chu New Delhi aṭangin a vai liam. Mt. Everest lawn turte zingah hian Mizo hmeichhia pakhat Lalrintluangi d/o Lalbiaknipuia, Dawrpui Vengthar a tel.

11th. Friday: New Champhaia KṬP General Conference vawi 56-na neihna pandal chu hnatlangin ṭhiah a ni a. Senghawi a nih mek laiin a chim a, Vanmawia (45) s/o Zataia, Champhai Kanan Veng chu thiin, mi dang panga an hliam.

12th. Saturday: Minister pali – R Lalzirliana, Lalsawta, Lal Thanzara leh C.Ngunlianchunga te chuan Dawrpui venga sorkar hnathawh kal mekte an en a; PWD leh UDPA department hotute’n an ṭawiawm.Minister-te hi Dawrpui Local Council hruaitute’n an harsatna leh mamawh hrang hrangte an lo hrilh a, harsatna sutkian dan turte an sawiho nghal a ni.

13th. Sunday: Baptist Church of Mizoram rorelna inkhawmpui lian ber Assembly vawi 120-na, Hnahthial Bazar BCM biak-ina neih chu a ṭiak. BCM chuan, Pathianni serh chungchangah hmalak ni se, a ṭul dana zirin inkaihhruaina siam ni se, an ti.BCM hian mission field leh station 25 an nei a, chung zinga 17 chu ram danga mi a ni. Mission field hrang hrangah thawktu 1,230 an awm a, kum 2015 chhung khan ring thar 3,773-in baptisma an chang a ni.

14th. Monday: Mizoram Auto Rickshaw Owners Association (MAOA), Lunglei hqrs. chuan life time road tax pek an duh loh lantirna atan Lungleiah AOC aṭanga Venglai thleng, auto rickshaw-in kawng an zawh.

15th. Tuesday: Mizoram Legislative Assembly budget session chu tan a ni a; March 31, 2016 thleng a awh dawn a ni. Governor Lt.Gen. Nirbhay Sharma-a’n thu a sawi.

16th. Wednesday: LPS Vision neitu, Laldailova Pachuau (83) chu chuap cancer vangin New Life Hospital-ah a thi a, vui nghal a ni. Laldailova Pachuau hi kum 1957-ah Biakveli nen inneiin fa pasarih an nei a, sumdawnna lama mi hlawhtling tak niin, kum 1991 khan Mizo TV local channel LPS Vision a din a ni.

17th. Thursday: T.Romana College leh Mizoram Library Association ṭangkawp chuan IPR auditorium-ah khawtlang nun danglam zela library pawimawhna zirhona an buatsaih a, Art & Culture secretary Thanhliri Pachuau-in a hmanpui. Thanhliri Pachuau chuan, library chu mipuite zirna in tia hriat a nih ṭhin thu sawiin, “Kum, hnam, sakhua, vun rawng, nihna eng mah sawi loin, eng mi pawhin a mamawh a zawna a hmuh theihna hmun a nih avangin a pawimawh hle,” a ti a; librarian-te chu mipui rawngbawl hna pawimawh tak vuantu an ni tih hre reng turin a chah. Seminar-ah hian sorkar hnuaia public library-a thawk te, college hrang hrang librarian-te leh NGO hrang hrang library enkawltute an tel a ni.

18th. Friday: Congress party chuan Congress Bhavan-ah tun hnaia Public Affairs Centre, Bengaluru-in India ram state tê 12 zinga good governance-a ṭha bera Mizoram a thlan lawmna hun an hmang. MPCC president Lal Thanhawla chuan thingtlang leh khawpuiah an party an pung zel nia sawiin, “Tute’n emaw Mizoramah term thum a sorkar theih loh anga an sawi fo hi India ram state dangah pawh a theih avangin Mizoramah a theih loh chhan tur a awm lo,” a ti.

19th. Saturday: Mizorama Seventhday Adventist ṭhalaite chuan khawvel hmun dang rualin Global Youth Day an hmang a; mi dangte tana thil ṭha tihna hun atan an hmang.Aizawlah chuan Adventist Youth Federation, Aizawl West, Aizawl East leh KLS branch-te’n a huhoin damdawi-in hrang hrang tlawhin, damlo leh a awmpuitute hnenah eitur an sem a, home hrang hrangah ei tur leh an mamawhte an sem bawk.

20th. Sunday: Tumkau Ni a ni a, Isua Krista Jerusalem-a lal anga luhna hriat reng nan zing karah hmun hrang hrangah tumkau cháwia kawng zawh a ni

21st. Monday: Pachhunga University College-a Psychology department-in kum 2014-a Mizorama chanchinbu mite tana “Suicide: Sensitization and Prevention for Media Professional” tih thupui hmanga seminar an buatsaih kal zela lehkhabu an buatsaih chu MJA vice president Zonunsanga Khiangte-in Aizawl Press Club-ah a tlangzarh. Lehkhabu hi Dr Saichampuii, Dr Rinpari Ralte leh Lalropuii te buatsaih a ni. Lehkhabu hi Rs. 150/- man a ni.

22nd. Tuesday: MNF president Zoramthanga chuan Myanmar second vice president atana Zo hnahthlak tling thar, Van Thiao hnenah lehkha a thawn a; vice president-a a tlin avanga lawmpuina leh duhsakna a hlan.

23rd. Wednesday: Mizoram Journalist Association (MJA) chuan Berawtlanga Art & Culture Auditorium-ah General Conference vawi 43-na an hmang a; minister Lal Thanzara khuallian niin, minister of state C.Ngunlianchunga khualzahawm a ni. MJA conference-ah hian chawhnu lamah kum 2016-18 chhunga hruaitu tur thlanna leh rorel inkhawm neih a ni a; president-ah Vanlalrema Vantawl, Zalen chanchinbu enkawltu chu thlan a ni.

24th. Thursday: World TB Day chu ramchhung hmun dangte rualin Eye Building,Mamit District Hospital ah hman a ni. Pi Lalbiaksangi MCS,District Bawrhsap chuan khuallian niin a hmanpui. Inkhawm hi Dr.Lalrinthangi DTO in kaihruaia,Andrew Vanlalhruaia DPPM Co-ordinator in lawmthusawina a nei ani.

25th. Friday: Mizoram a upa ber nia sawi leh hriat Tawipui ‘S’ khawchhuak Pi Huatchuangi chu tuna a chenna a fanu Pi Ngunleni in Farm veng, Lungleiah ah kum 116 mi niin a boral ta. Ani hi kum 1900 a piang a ni.

26th. Saturday: Sihphir Branch YMA ten ramngaw leh nungcha humhalh beihpui an thlak mek kal zelah an khaw ram chhungah silai hmanga sa leh nungcha dangte pêl ṭhin an awm ṭhin tih hriain YMA hruaitute leh member eng emaw zat chu an khaw tlak lam ramah an feh chhuak a, thingzai lai engemawzat bakah thingzai tute kut atangin silai panga an man nghal.

27th. Sunday: Delhi leh Lengpui inkara thlawk tur thlawhna a thlâwk ṭan a, ni tin a thlawk ṭhin ang. Lengpui Airport-a a rawn ṭum hmasak ber lawm nan hian ‘water salute’ hmangin airport-ah lo lawm a ni. Delhi-Aizawl via Guwahati flight hi Jet Airways a ni a, Boeing-737, 800 series niin, mi 168 a chuan theih.

28th. Monday: Home department-a additional secretary Lalbiakzama hoin a pisaah Fire Service Week, 2016 hman dan tur rel a ni. Week hman chhung hian vantlang hmun pawimawh laiah kângmei laka inven dan entirna buatsaih leh hmun pawimawhte kângmei laka a him leh him loh enfiah an rel.

29th. Tuesday: Ṭhuampui branch KṬP chuan Central KṬP blood donation calendar angin Aizawl Civil Hospital tan thisen unit 32 an pe a, a petute mipa 27 leh hmeichhia panga an ni.

30th. Wednesday: Zonuam venga RL Laldawngliana in kawta motor dah khawm chu a kâng a, hâl nia hriat a ni. Motor kângte chu, RL Laldawngliana i10 car, bike pahnih leh scooty pakhat a ni. Motor kângte hi a kang chhe hlawm hle. Laldawngliana te kawt velah hian motor an riah khawm ṭhin a, motor dang awm ve parukte chu a kan kâi hmain ṭhenawm khawvengte’n an veng hman a ni.

31st. Thursday: March 15, 2016-a ṭan Mizoram Legislative Assembly pasarihna session ṭum riatna chu zawh a ni. Speaker Hiphei chuan session-a member-te chêt dan chu khawvelin entawn se a duh thu a sawi. Tun ṭum session-ah hian Finance minister Lalsawta’n kum 2016-2017 chhunga Mizoram budget tur cheng vbc. 8038.39/- House-ah a pharh a, pass a ni. Session atan hian zawhna ziaka chhan chi (unstarred question) 34 a lut a, chung zinga 30 chu pawm niin, chhan loh panga a awm.

Lungding

Tui tha chakna hmang a siam…

Hetiang pawh hi…

Hei pawh

1st. Friday: Chief Minister Lal Thanhawla chuan Congress Bhavan-a an party inkhawmah thu sawiin, Assembly budget session neih zawh tâka eptu member lam tan sawi chhiatna tur a awm lo a, an fak lo thei lo nia sawiin, “A chhan chu kan opposition member-te thu dikah an ṭang ngam a, huaisen takin thurâwnte min pe ngam a. An hotute nen an inang lo a, kan opposition member-te an fakawm hle a ni,” a ti.

2. Saturday: Mizoram Legislative Assembly building tuala Mizoram District Council member ni tawhte hriatrengna lungphun siam thar chu Assembly speaker Hipheia’n a hawng. Mizo District Council-ah kan member ni tawh 78 an awm a, chung zingah chuan mi pasarih – C.Chhunbura, CL Ruala, Mehlai Hlychho, RC Thanga, PC Saprema, Thangchungnunga leh ZV Lalmawia te an la dam a ni.

3rd. Sunday: Counter Insurgency and Jungle Warfare School (CIJWS) commandant, Maj. Gen. MS Ghura chuan Pathianni zan khan chief minister Lal Thanhawla chu a chenna banglaah a hmu a, CM-te nupa hnenah duhsakna thilpek a hlan.

4th. Monday: Minister Lal Thanzara chuan Mizoram PWD hnuaia hmalakna, Hnathial-Haulawng (via Zotuitlang) kawng laih leh Tuipui-D (Darzokai) lei dawh mek a tlawh a, hnathawh dante a enfiah. Hnahthial-Haulawng (via Zotuitlang) kawng laih hna hi January 29, 2016-ah thawh ṭan niin, NLCPR Phase-I (km. 12) siamna tura senso tur zat chu cheng nuai 1515.75/- a ni a, January 29, 2019-a thawh zawh tura tih a ni. Tuipui-D lei dawh hna chu November 19, 2012-ah hna thawh ṭan niin, April 30, 2016-ah zawh theih beisei a ni thung.

5th. Tuesday: Saiha, Khawzawl leh Hnahthialah te Prime Minister Crop Insurance Scheme (PMCIS) chungchang lo neitute hrilhfiahna hun buatsaih a ni.

6th. Wednesday: Governor Lt.Gen. Nirbhay Sharma chuan Lunglei Circuit House conference hall-ah Lunglei bawrhsap Abhijit Vijay Chaudhari leh Lungleia sorkar department hotute a kâwm. Larsap chuan, sorkar hmalakna zingah a bik takin Rural Development, Health, Education, UDPA, PHE, PWD leh bank-te hnathawh chungchang hriat a duh thu a sawi a; department official-te’n sorkar ruahmanna hrang hrang kalpui mek leh hnathawh dante an tarlang.

7th. Thursday: World Health Day a ni a, Mizoram hmun hrang hrangah hman a ni.

8th. Friday: AH&Vety minister C.Ngunlianchunga chuan Thenzawla AH&Vety farm a tlawh a, ran chaw chînna hmun tihchangtlun dan tur leh tuna hmalakna tur a hmachhawp awm sate bawhzui dan tur a enfiah. Kum 2016-17 chhunga AH&Vety department-in Thenzawl farm-a hma thar an lakna tur survey nghal a ni a, ruahmanna chi hrang hrang an siam.

9th. Saturday: Mizo zinga Union minister awmchhun Dr C.Silvera (81), Tuikhuahtlang chu lung ṭha lo avangin a thi. A nupui Lallawmzuali leh a fate pali a kalsan.

10th. Sunday: Isua Krista Kohhran (IKK) Ṭhalai Pawl General Conference vawi 39-na leh an kum kum 40 tlinna, Ruby Jubilee lawmna April 8, 2016 a Vaphai Kohhran biak-ina tan chu a ṭiak. IKK Ṭhalai Pawl conference-ah hian palai 1,300 vel an kal a, kum 2016-17 budget atan Rs. 5,00,000/- an pawm.

11th. Monday: Serchhip District National Tobacco Control Programme (NTCP) hnuaia Tobacco Cessation Clinic (TCC) chu JN Hospital-ah hawn a ni. Clinic hi zûk leh hmuam sim duh tan pan theih a ni a, damdawi leh counselling hmangin zûk leh hmuam sim duhte ṭanpui ṭhin an ni ang.

12th. Tuesday: DRDA Champhai chuan Champhai Venglai community hall-ah, Khawzawl leh Ngopa block-a VEC member-te tan MGNREGA chungchangah training an buatsaih a, Champhai DC Vanlalngaihsaka’n a hmanpui.

13th. Wednesday: Kumin atan lirnghing hriat thamin vawi hnih a thleng ta. Tun tuma lirnghing hi US Geoplogical Survey tarlan danin, lirnghing inṭanna (epicentre) chu Myanmar rama Sagaing region-a Mawlaik-ah a ni a, lei chhung km. 135 vela thûk aṭanga irh chhuak niin, magnitude 6.9-a ná a ni. Lirnghing hian Mizoram pawh na takin a sâwi a, mipui a tithlabar hle a, second 30 vel a nghîng a ni. Thi an awm lo a, hlauhthawn avanga tlanchhiatna lamah mi pahnihin hliam tenau an tuar.

14th. Thursday: Lawipu community hall bula Central YMA rama CYMA Hostel sak tur lungphûm chu chief minister Lal Thanhawla’n a hawng a; CM chuan, hostel khuahkhirhna dan siam a ṭul thu a sawi. Hostel hi cheng nuai 520.48/- senga sak tur a ni. Hna hi thawh ṭan nghal tur a ni a, kum hnih chhunga zawh tura ruahman a ni. A senso tur sum cheng nuai 520.48/- hi Ministry of DoNER-in 90% a tum a, a bak 10% chu Mizoram sorkarin a tum ang.

15th. Friday: April 5, 2016-a thi Lalhmingsangi (26) w/o Hrangrotluanga, Khawzawl Vengthar chu a thih danah rinhlelhawm a awma ngaih a nih avangin magistrate enpuina hnuaiah police leh Khawzawl Vengthar YMA-te’n an phawrh a, doctor-te’n an endik hnuah phûm leh nghal a ni.

16th. Saturday: Tualpui Presbyterian Kohhran biak-in sak thar chu Synod moderator Rev. H.Lalrinmawia’n hawngin, Pathian hnenah a hlan. Biak-in sak nan hian Rs. 49,71,614/- an sêng a, a dung ft. 53 leh a chanve, a vâng ft. 40 a ni.

17th. Sunday: Biate khuaa kohhran hrang hrangte chuan, ‘Chhanchhuahna Ni’ an hmang. Chhanchhuahna Ni hi rambuai lai, April 17, 1966-a sipaite laka Biate khua chhanchhuahna ni hriatrengna a ni.

18th. Monday: Sorkar laipui hmalaknaa thingtlang mite chawikanna tura ruahmanna kalpui dan viltu, State Level Vigilance & Monitoring Committee chu New Secretariat conference hall-ah an ṭhukhawm. Meeting hi parliamen¬tary secretary Lt. Col. ZS Zuala’n kaihruaiin, Lok Sabha MP CL Ruala, minister pa¬hnih Zodin¬tluanga leh PC Lal¬than¬liana, MLA Chalrosanga Ralte bakah, a kaih¬hnawih department secretary leh director-te an tel.

19th. Tuesday: Mizoram Upa Pawl (MUP) chuan Vanapa Hall-ah General Assembly an hmang a, Social Welfare minister PC Lalthanliana’n a hmanpui. Inkhawmpui hi president RK Thanga’n a kaihruai a ni.

20th. Wednesday: Lengpui Model Vengah Lalringi in, Assam type chu bungraw chuh hman lohin a kâng ral. Kângmei hi in chhunga electric hrui kâng aṭanga chhuak nia hriat a ni

21st. Thursday: Mizoram Legislative Assembly session ni khat awh neih a ni a, session-ah hian ‘The Mizoram (Land Acquisition, Rehabilitation and Resettlement) Bill, 2016’ pass a ni a; April 9, 2016-a thi, Union minister of state hlui Dr C.Silvera sûnna hun hman a ni bawk.

22nd. Friday: Thanhranga @ Mathana (39), Mission Venga awm leh Hnahlan lam mi nia insawi chu Facebook-a chief minister Lal Thanhawla laka tharum thawh duhna lam hawi a post avanga man chu police-in an kawl hnuah rilru lam chiang loa hriat a nih avangin Kulikawn damdawi-inah dah luh a ni.

23rd. Saturday: Department of Science & Technology bultuma siam, Hmunpui khuaa ruahtui khawlna tuizem 12 chu minister John Rotluangliana’n a hawng. Tuizemte hi Science & Technology hnuai¬ah Mizoram Science, Technology and Innovation Council (MISTIC), Directorate of Science & Technology-te’n a siam hna an thawk a ni.

24th. Sunday: Pu V.Lalsangmawia (61) s/o Lawrkhuma Kolasib Project Veng VCP chu rannung thahna hlo a in palh vangin Kolasib Civil Hospital-ah a boral. Pu V.Sangmawia hi a fanu Vansangpuii nen chauh a khawsa an ni a, he thil thlen lai hian a fanu hi a zin bo hlan a ni.

25th. Monday: World Malaria Day a ni a; Mizoram hmun hrang hrangah hman ve a niin thupui chu ‘End malaria for good’ tih a ni.

26th. Tuesday: Govt. Champhai College Disaster Management Committee buatsaihin chhiatrupna thlen thulha insenghawi dan lemchan College-ah neih a ni a. Champhai DC Pu Vanlalngaihsaka, IAS chuan a telpui. Pu Vanlalngaihsaka chuan, “Mizo kan vanneihna chu chhiat tawh nikhuaah tlawmngaih chhuaha kalkhawm kan thahnem thin hi a ni a. Kan tlawmngaihna kan lantirna hi a tangkai zual zawk theih nan training tha tak neih a, chhan ngai leh puih ngai te awmze nei taka puihbawm dan tha zawk kan hriat hi a pawimawh dawn a ni,” a ti.

27th. Wednesday: Mizo Academy of Letters (MAL) chuan Aizawla IPR Auditorium-ah Foundation Day an hmang a, Art & Culture minister R.Romawia’n a hmanpui. He hunah hian Book of the Year 2015 ‘Kawlkil piah lamtluang’ tih ziaktu C.Lalnunchanga hnen¬ah Rs. 5,000/- leh thuchei a hlân. MAL hian Book of the Year 2015 thlang tur hian lehkhabu 140 an endik niin an tarlang. Book of the Year hi kum 1989 a an tih tan atang khan mi pali-in an dawng nawn tawh a; a dawngtu zingah hmeichhia pathum an tel tawh bawk.

28th. Thursday: MBSE chuan HSLC Examination 2016 result a tichhuak a, zirlai exam 18,091 zinga 12,427 (71.17%) an pass. A pumpuiah C.Vanlalnghaka s/o C.Chhuanthangpuia (Chhinga Veng, Aizawl) Home Mission School pakhatna a ni. HSLC 2016-ah hian distinction-ah mi 629 an pass a, first division-ah 2,025, second division-ah 3,510 leh third division-ah 6,263 an pass. Zirlai pass vekna sikul 72 an awm a, zirlai fail vekna sikul pali an awm thung. Exam hmachhawntute hi hmeichhia 8,890 leh mipa 8572 an ni a; regular-a exam beitu 17,071 niin, private-a exam mi 391 an ni.

29th. Friday: Aizawl lam pana tlân truck AS-11 AC-6968 chuan Tachhip khuaah Lalrokima s/o Thanzuala in, Assam type, kawngpui âna awm chu a hnâwl a; kawng thlangah ft. 150 vel lum zuiin, truck-a chuang Chakma nula pakhat a thi. A bag-a a matric certificate-a a inziah danin, Bawidi Tongchongya d/o Birolokia Tongchongya a ni. Truck-a chuan mi pathum bakah in neitute chhungkua, member parukte chuan hliam an tuar.

30th. Saturday: HT Sangliana, IPS (rtd.)-in a chanchin a ziahna, ‘HT Sangliana: An Autobiography of Super Cop’ tih chu Aizawl Press Club-ah MJA president Vanlalrema Vantawl-in a tlangzarh. Lehkhabu hi phek 458-a chhah, Rs. 250/- man a ni.

1st. Sunday: Thli tleh vangin Lallen khuaah high school chu luah theih loh in a chhia.

2nd. Monday: Dr. Judy Laldinpuii (42) d/o C.Tawnluaia, Tuikual South, Guwahati-a hna¬thawka awm chu Guwahati-ah a thi. Dr. Judy hi neuro-surgery super specialist a ni.

3rd. Tuesday: Hunthar Venga lei tlahniam bulah gas phur truck-in bike MZ-01 H-8100 a chíl a, bike khalhtu Gordon Lalbuatsaiha (32) s/o Dengzika, Dawrpui Vengthar chu Aizawl Civil Hospital thlenpui a nih hnuah a hliam tuar loin a thi.

4th. Wednesday: Bhaidas Hall, Juhu, Mumbai-a JJT University-in 3rd Special Con-vocation an hmanah Governor Lt.Gen. Nirbhay Sharma hnenah Doctor of Letters (D.Litt) degree hlan a ni. Mizoram Governor chuan, India ram leh mi¬puite tana hna a lo thawh tawhte ngaihhlutsak a, D.Litt. Degree pek a ni chu lawmawm a tih thu a sawi.

5th. Thursday: Sumsuih khaw daiah maxicab, AS-11 AC-9303 chu kawng laiah a let a; mi pali hliamin thi erawh an awmlo hlauh. Motor hi a chiangkuan loh avangin Sumsuihah an siam a, an siam zo an tlan leh chu Midum Kham kawngpuiah an chesual ta mai a ni.

6th. Friday: Aizawl leh Tuipuibari inkara tlan MST bus chu Tuipuibari leh Damparengpui inkar, Tuipuibari aṭanga km. hnih leh a chanve velah chesualin, kawng thlang ft. 50 velah a tla a; thi an awm lo a, mi 19 an hliam.

7th. Saturday: Assamese kum thar kut Rongali Bihu chu Assam Cultural Society (ACS) buatsaihin Vanapa Hall-ah hman a ni a. Chief Minister Pu Lal Thanhawla chu Khuallian niin, a nupui Pi Lal Riliani’n a tawiawm a ni. Pu Lal Thanhawla chuan Assam Cultural Society te’n an kum thar kut lawmnaa Khualliana an sawm chu lawmawm a tih thu sawiin, kal khawmte chu kum tha tak hmang turin duhsakna a hlan.

8th. Sunday: Mother’s Day (Nute Ni) a ni. Salvation Army-a corps hrang hrangte chuan Mothers’ Day pual hian hun an hmang.

9th. Monday: Ngaizelah Lalramhluna (37), Tlangnuam Block Veng ruang chhar a ni.

10th. Tuesday: Dawrpui Multipurpose Centre sakna turah LB Hruaitluanga s/o MS Dawngliana, Sailam ruang chhar a ni.

11th. Wednesday: Mizoram Board of School Education (MBSE) chuan, Higher Secondary School Leaving Certificate (HSSLC) Examination 2016 result a tichhuak. Zirlai exam 11,389 zinga 8,747 an pass. Pass percentage chu 76.80% a ni a, kum 2015-ai in kumin hian pass hi an tha zawk (74.53%) a ni. HSSLC 2016-ah hian distinc¬tion-ah mi 202, first division-ah mi 1,736, second division-ah mi 2,827, third division-ah mi 3,882 an pass a; fail mi 2,428 awmin, compartmental chance nei mi 214 an awm. Zirlai pass vekna sikul 41 an awm laiin, zirlai fail vekna sikul paruk a awm thung.

12th. Thursday: International Nurses Day a ni a, he ni pual hian Mizoram hmun hrang hrangah nurse-te’n hun an hmangin thil tha tih nan an hmang hlawm.Nurses Day hi khawvela nurse hna thawktu ropui, Florence Nightingale pian ni, May 12-ah hman ṭhin a ni a, amah hi kum 1820-a piang a ni.

13th. Friday: Mizo Students’ Union (MSU) chuan Vanapa Hall-ah HSSLC Examination 2016-a hlawm (stream) hrang hrang palia Mizo zirlai ti ṭha zual pathum ṭheuh lawmpuina hun an hmang a; MBSE chairman Dr Lalchungnunga’n a hmanpui. HSSLC-a ti ṭha pakhatnain Rs. 5,000/-, pahnihnain Rs. 3,000/- leh pathumnain Rs. 2,000/- leh thilpek dangte an dawng a ni.

14th. Saturday: Champhaia Excise & Narcotic department leh Custom department mite joint operation chuan, Myanmar rama zu siamna chi khat, BEDC litre 756 an man a; a neitua puh mi pathum leh an phurhna maxicab leh taxi an man tel bawk.

15th. Sunday: Pentikos ni a ni a, Mizorama kohhran hrang hrangin an hmang. Pentikos ni hi Easter Sunday aṭanga chhiara ni 50-na a ni.

16th. Monday: Sesawng Bial KṬP chuan Sesawng khuaah Synod Hospital tan thisen unit 25 an pe a, a petute mipa 24 leh hmeichhia pakhat an ni.

17th. Tuesday: Kawnpui damdawi in chuan, sikserh dona beihpui thlakna chi khat atan Hortoki khuaah a thlawna inentirna an buatsaih a; mi 73-te hriselna dinhmun an endik bakah, thisen an endiksak bawk.

18th. Wednesday: Vairengte Presbyterian kohhran pastor quarters thar sakna lungrem chu a chim a, a thlanga chenna in leh Maruti car a delh chhia.

19th. Thursday: Mizoram hmar lam, Aizawl district-a khaw 25 leh Kolasib district-a khaw parukah village council inthlan neih niin, mipui¬te’n vote an thlak. Inthlan zawh veleh vote tlate chhiar nghal a niin khaw 31-a V/C inthlana political party-te’n hnehna an chan dan chu – INC-15, MNF-8, ZNP-1, BJP-1 a ni a; party chak bik awm lohna khaw pali awmin independent candidate-te chakna khaw pahnih a awm bawk.

20th. Friday: Mamit district-a Damdiai khaw bulah pick-up a chesual a, motor neitu leh khalhtu ni bawk CL Zarliana (59), Mamit Venghlun VCP chu a hmunah a thi. Mi dang pakhat chuang ve erawh chu a na lo thung. Motor hi Bairabi-a bazar tura kal a ni.

21st. Saturday: Commercial Vehicles Joint Action Committee (CVJAC) chuan an thil phût nawr nana May 18, 2016 aṭanga tiam chin awm loa nawrh an huaihawt avanga sumdawng lirtheite ni li chhung an tlân loh hnuah titawp lailâwkin sumdawnna lirtheite an tlan leh ṭan.

22nd. Sunday: Bairabi bul Tlawng lei (RCC), Kolasib district leh Mamit district inkalpawhna tur dawh mek chu a ban leh ban inkara cement chhûn mek dona tui lianin a len chiat avangin a chim. Kum 2007-a dawh ṭan Tlawng lei hi metre 160-a sei tur a ni a, a chim lai hi ban leh ban inkar metre 40 niin, dawh zawh tawh metre 120 chu a chhe tel lo. A chimna laiah hian May 20, 2016 khan cement an chhûng a, a la ngheh loh avangin tui lianin a dona ban chu lên chhiain a chim ta a ni. Lei chim vang hian thi leh hliam an awm lo.

23rd. Monday: May 21, 2016 zan dar 6:40-a Zonuam, Aizawla leiminin in a delha hliam, Kaplali (80) m/o Rualthankhuma a hliam tuar loin damdawi inah a thi. Leiminin in a delh vang hian Lalthlengliani (40) leh a fanu Lalhmangaihzuali (13)-te an lo thi tawh bawk a ni.

24th. Tuesday: Mizorama cable TV analog signal hmanga pek chhuah ṭhin, digital signal-a leh hna kalpui meka hmasawn dan leh harsatna awm¬te additional chief secretary Arvind Ray hoin Secretariat conference hall-ah sawiho a ni a; chak zawka hmalak theih dan tur an ngaihtuah nghal. Meeting-ah hian sorkar offcial-te bakah MICODA, Mizoram Consumer Union, LPS Vision, ZONET Cable TV Pvt. Ltd. leh district hrang hranga cable TV aiawhte an tel a ni.

25th. Wednesday: Lunglei High Powered Committee sum cheng nuai 10/- sênga Lunglei College-a tuizém siam chu Lunglei HPC vice chairman S.Laldingliana’n a hawng. S.Laldingliana chuan, zirlaite leh college hmasawnna atan HPC a inhawn reng thu a sawi.

26th. Thursday: Industries Minister Pu H.Rohluna chuan disposable cup siamna, ‘Dispocraft’ chu Industrial Growth Centre (IGC), Luangmualah a hawng a. R&R Industry enkawl, ‘Dispocraft’ hian nikhatah disposable cup nuai khat chuang lai a siam chhuak thei a ni. Dispocraft din nan hian cheng nuai za leh sawmsarih chuang senral a niin Vijjaya bank-in an finance a. Disposable cup siam nan hian Rajoo Engineer siam khawl hmangin Reliance company siam hmanrua an hmang a ni. R&R Industry hian Dispocraft-ah hian hnathawktu mi 15 vel an ruai mek bawk.

27th. Friday: Bairabi leh Silchar inkarah khualzin (passenger) phur rél lian a tlân ṭan. Khualzin rel hi prime minister Narendra Modi chuan video conferencing hmangin Shillong aṭangin a vailiam a; Bairabi rel chawlhhmunah he mi pual hian inkhawm buatsaih a ni bawk. North East Frontier Railways siam khualzin phur rél lian hi ni tin Bairabi aṭangin a chhuak dawn a, Silchar thleng chuan man Rs. 35/- a ni ang. Rel hian zing dar 5:45-ah Bairabi a chhuahsan ang a, zing dar 9:15-ah Silchar a thleng ṭhin ang. Silchar aṭangin tlai dar 4:45-ah chhuakin, zan dar 8:15-ah Bairabi a thleng ṭhin ang.

28th. Saturday: Sihphir bial KṬP chuan Aizawl Civil Hospital tan thisen unit 35 an pe a, a petute mipa 32 leh hmeichhia pathum an ni.

29th. Sunday: ‘ṬKP Ramthim Ni’ a ni a, Mizoram hmun hrang hranga ṬKP unit-te’n an hmang. Kumina ṬKP Ramthim Ni thupui chu ‘I puan-in hmun chu zauh rawh’ tih a ni a; missionary-te leh Mission rawngbawlna pualin an ṭawngṭai rual a ni.

30th. Monday: Mizorama zirtirtute dinhmun zir chianna leh¬khabu, ‘Working Conditions of Teachers in Mizoram’ tih chu School Education Directorate conference hall-ah School Education minister H Rohluna’n a tlangzarh. H.Rohluna chuan, India rama neih vawi khatna – zirtirtu hrang hrangte dinhmun zir chianna buatsaih a ni chu lawmawm a tih thu sawiin, “Zirna leh a hmasawnna atana hma latu hrang hrangte’n an hlâwkpui phah ngei ka beisei,” a ti.

31st. Tuesday: Lunglei, Tlabung leh Lungsena Mizo Students Union (MSU) hruaitute chuan dan loa khaw din nia sawi, Tuichawngchhuah khua an tlawh a; khuaa chengte chu December 2016 ral hma ngeia chhuak turin an hriattir a, an chhuah loh chuan hâlsakah an vau. MSU chuan, Tuichawngchhuah chu Belpei V/C ram chhunga awm a ni a, kum 2014-a LAD-in Lunglei district-a sub-village a tihchhuah 23 zingah a tel lo niin an sawi.

1st. Wednesday: Lawngtlai district MJA chuan ni thum awh tur Lawngtlai Press Club-ah a thlawna inentirna an buatsaih a, AH&Vety minister C.Ngunlianchunga’n a hawng. Dr PC Lalram¬enga leh Lawngtlai Dis¬trict Hospital-a doctor pangate’n damlote hi an en a ni.

2nd. Thursday: AH&Vety department chuan Mamit, Phaizau leh Damdiai khuaa NLUP hnuaia ar vulh thlangtu chhungkaw 19 hnenah ar in sakna atan Rs. 20,000/- ṭheuh an sem.

3rd. Friday: Central YMA hnuaia Supply Reduction Service (SRS)-te chuan Hrangvuana, Khawmawi nia insawi hnen aṭangin heroin hawng 4 an man. Heroin an man hi tualchhunga an hralhna rate ang chuan Rs. 1,80,000/- man a ni.

4th. Saturday: Ruahsur avangin Tuikual thlânmual a min a, thlân pakua a chhia.

5th. Sunday: Mizoram Synod buatsaih June 3, 2016 zan aṭanga Bungkawn Kohhran biak-ina Synod Revival team-te tan Revival Meet vawi 5-na neih chu a ṭiak. Inkhawmah speaker hrang hrangin thuchah an sawi a ni.

6th. Monday: IAS officer hlui leh lehkhabu ziaktu lar, Lalhmingliana Saiawi (76), Chaltlang chu thawhah avangin a thi. Lalhmingliana Saiawi hian a nupui Lalthankhumi, a fate pathum – Ramdinsanga Saiawi, Ramzauva Saiawi leh Muanpuii Saiawi (IFS) leh a tute a kalsan.

7th. Tuesday: Champhai Sesih tlanga helicopter ṭumhmun (helipad) siam thar chu hman ṭan a ni. Helipad hi December 2014-ah siam ṭan niin, a siam nan NLCPR aṭanga sum hmuh nuai 54.6/- hman a ni a, PWD kaltlangin contractor-te’n an siam a ni. Helipad hi Aizawl leh Champhai inkara helicopter service ṭum nan hman a ni ang.

8th. Wednesday: Nisapui Bial KṬP chuan Nisapui Kohhran hall-ah blood donation camp an huaihawt a, mipa 31 leh hmeichhia pakhatte’n Synod Hosiptal tan thisen unit 32 an pe.

9th. Thursday: Ramzauva (46) s/o Laldawla (L), Samtlang, Aizawl district chu an khuaa Mizoram UPC kohhran biak in an saknaah electric current-in a man hlum. Biak ina an hnatlannaah hian dár khaina tur an khawih a, biak in chunga electric line chu a hniam avanga mau roa do kàn a tumna lamah Lalramzauva hian electric hrui a tawng palh ta a ni.

10th. Friday: Mizoram Ex-Servicemen League chuan an pisaah Governor Lt.Gen. Nirbhay Sharma-a’n D.Litt. degree a dawn lawmpuina leh chawimawina hun an buatsaih. Ex-servicemen-te lawmpuina chu thinlung taka a lawm thu sawiin Lt.Gen. Nirbhay Sharma chuan, “Kum 1963 aṭanga India ram tana ka feh chhuah aṭangin India ram state zawng zawng deuh thawah ex-servicemen-te ka kâwm tawh a, Mizorama ex-servicemen-te tluka nêlawm leh min titlángnél thiam ka la tawng lo,” a ti. Governor Lt.Gen. Nirbhay Sharma hi Shri JJT University, Mumbai-in May thla khan India ram leh mipuite tana a hnathawh ṭhat vangin Doctor of Letters (D.Litt.) degree an hlan a ni.

11th. Saturday: Zorinpuia Leihang (17), Vartek khua chu Lawngtlai College Vengah electric current-in a man hlum. Zorinpuia hi Lawngtlaiah pawl 11 admission ti turin a nu nen an kal a, an thlenna in chunga tui dawhna tur an siam laiin electric current-in a man a, damdawi-in panpui a nih hnuah a hliam tuar loin a thi a ni.

12th. Sunday: Kelkang Presbyterian Kohhran chuan Kelkang hlimpui an chan tirh atanga kum thumna pualin Pathian hnenah lawmthu sawina an hmang. Hlimpui intan atanga kum 3 chhung chu zantin a zawnin an inkhawm tawh bawk a ni. Synod Moderator Rev. H.Lalrinmawia chuan he hun hi a hmanpui.

13th. Monday: Council of Minister chief minister Lal Thanhawla hoa CS conference hall-a ṭhukhawm chuan, Mizoram Motor Vehicles (Taxation) Act, 1996 tihdanglam chu an pawm a, dan siamṭhatah hian life time tax tihtawp a ni a, lirtheite’n kum nga atan zel chhiah an pe tawh ang.

14th. Tuesday: Fisheries department chuan, NLUP-a sangha vulh thlangtu chhungkaw 27 hnenah sangha dîl siam puitlina atan ṭanpuina sum an sem. Mi 27 hnenah hian Rs. 6,000/- ṭheuh pek a ni.

15th. Wednesday: Sudden Muanga ziaktu Lalsangzuala (Laisai¬zawks) chu Sky Hospital, Imphal-ah zunthlum avangin a thi.

16th. Thursday: Sihhmui leh Lengpui inkar, Tlawng luia thir lei (bailey bridge) chim tawh dawh ṭhat hna chu PWD (Mechanical Circle)-in an thawk zo.

17th. Friday: PC Girls School hostel building thar chu Synod moderator Rev. H.Lalrinmawia’n Pathian hnenah hlanin a hawng. Hostel hi May 2014-a sak ṭan niin, kum hnih chhunga sak zawh a ni a; a dung ft. 84 leh a vâng ft. 45 a niin chhâwng thum a sang a ni.

18th. Saturday: Governor Lt. Gen Nirbhay Sharma chuan Falkawna Mizo Typical Village a tlawh a, he hmun hi tun hma lama Mizo nunphung leh ziarang pho langtu ṭha tak a nih thu a sawi.

19th. Sunday: Presbyterian Kohhran chuan ‘Rualbanlote Ni’ an hmang. He ni pual hian chawhnu leh zan inkhawmah hun hman a ni.

20th. Monday: Kolasib-a ni tin chanchinbu thar, ‘Kolasib Times’ chu Kolasib MJA president H Vanlalnghaka’n Kolasib Press Club-ah a tlangzarh. Kolasib Times-ah hian editor leh publisher chu LH Malsawmtluanga a ni.

21st. Tuesday: Khawel hmun dang rualin Mizo¬ram hmun hrang hrangah International Yoga Day hman a ni a, a hmanna pui ber Aizawla Lammualah chuan Governor Lt.Gen. Nirbhay Sharma hoa hman a ni. Governor chuan, Mizoram mipuite chu hriselna kawngah tun aia nasa zawkin inzirtirna lamah ṭan la se a duh thu sawiin, “Infiammi ni lo tan pawh awlsam taka tih ve theih, Yoga hi insâwizawina chi khat, hriselna kawnga mihring taksa nasa taka pui theitu a ni. Yoga hi excercise thianghlim, sakhuana thil vanga hlauhthawnawm a ni lo a, khawvel ram hrang 200 chuangah sakhaw hrang hrang vuantute’n an phûrpui mek a ni,” a ti.

22nd. Wednesday: Central YMA Kumpuan duty-te chuan Khamráng khaw dáiah gas phur truck pathuma gas an tichengpen lai an nangching a, gas tichingpentute an tlanchhia.Truck an mante no chu hei hi a ni: MZ-01 1335, MZ-02 9252 leh NL-08 A-5146.

23rd. Thursday: Lungdai Bial KṬP chuan Lungdai Koh¬hran hall-ah blood donation camp an huaihawt a, Aizawl Civil Hospital tan mipa 49 leh hmeichhia pasarihin thisen unit 56 an pe.

24th. Friday: Sihhmui leh Lengpui inkara Tlawng luia lei (bailey bridge) dawh chu lirthei chi tin kal theihin hawn a ni a, lirtheite’n an zawh ṭan nghal.

25th. Saturday: Mysore Mizo Welfare Association chuan an kum 10-na pualin Aizawl Civil Hospital-ah thisen an pe a, mipa paruk leh hmeichhia pahnihin an pe a ni.

26th. Sunday: Synod Moderator Rev. H. Lalrinmawia chuan Khawzawl Venglai pastor bial tlawhin chawhma IR Kohhran, chawhnu Vengsang leh zanah Venglai-ahte hun a hmang.

27th. Monday: Mizoram sorkara department puitling pahnih – Industries department leh Trade & Commerce department-te chu department pakhatah chhùn fin an ni a, Commerce and Industries department tih a ni tawh ang a, Industries director ni lai chu director a ni ang.

28th. Tuesday: Lai Autonomous District Council (LADC)-a CEM political adviser Hmunhre (81), Lawngtlai Council Veng chu cancer vangin Lunglei Civil Hospital-ah a thi. Pu Hmunhre hi kum 2010 khan LADC MDC atan thlan tlin a ni a, LADC Planning Board vice chairman hlui a ni.

29th. Wednesday: Saihaa MTP hruaitute chuan Saihaah sap zu Rs. 1,28,400/- hû an man a, Saihaa MJA member-te hmuh laiin an leih baw nghal. Zu hi Paniangi, Saiha Tlangkawn-in Lungleia wine shop aṭanga a lei khawm, Saihaa zawrh tura a tih a ni a; vaiin Rum ûm puitling báwm 29, ûm chanve chi báwm pariat, Whiskey báwm paruk leh beer báwm 15 a ni.

30th. Thursday: Remna Ni champha vawi 30-na chu Mizoram hmun hrang hrangah lawm a ni. Aizawlah chuan Lammualah lawm a ni a, Governor Lt.Gen. Nirbhay Sharma khuallian niin, chief minister Lal Thanhawla khualzahawm a ni. Larsap chuan, Mizo mipuite Remna Ni chibai bûkin, hma lam hun êng tak nei zel turin duhsakna a hlân.

1st. Friday: Doctors’ Day a ni a, Mizoram hmun hrang hrangah doctor-te’n Indian Medical Association (IMA), Mizoram State Branch huaihawtin an hmang. Doctors’ Day hi India rama doctor thiam tak, Bharat Ratna dawngtu Dr Bidhan Chandra Roy-a pian champha leh thih ni, July 1-ah kum 1991 aṭangin hman ṭan a ni. Dr BC Roy hi kum 1882-ah Patna, Bihar-ah a piang.

2nd. Saturday: Chawlhhmun ram, Tuithum hnára quarry a chim a, hna thawktu pakhat Lalhruaitluanga (23) s/o Ringthara, Chawlhhmun a delh hlum. A chim lai hian hna thawk mi pathum an awm a; pahnih an insaseng hman laiin, Lalhruaitluanga erawh chu a insaseng hman lo a, lung chim hian a chhilh ta a ni.
3rd. Sunday: Mizoram Presbyterian Kohhran chuan Health Sunday & Hospital Sunday an hmang. Health Sunday pualin chawhnu inkhawmah hun hman niin, thupui chu ‘Zunthlum’ tih a ni a; zanah Hospital Sunday puala hun hman niin, thupui chu ‘Damna kim Isua’ tih a ni. Mizoram Synod hian kum 1928-ah Hospital Sunday hmang ṭanin, kum 1988-ah Health Sunday an hmang ṭan a; heng ni pahnihte hi kum 2010 aṭangin ni thuhmunah an hmang kawp ṭan a ni.

4th. Monday: Kolasib-a Legal Metrology hnathawkte leh Kolasib-a thuthar thehdahtute chuan Kolasib Gosen Venga FCI kudama weighbridge an endik a, weighbridge chu a dik tih an finfiah.
5th. Tuesday: Chhungkaw pathum luah lai College Veng, Aizawla Lalbiakchunga s/o Duhchhunga in, Assam type a kâng a, bungrua chuh hman lohin a kâng ral.

6th. Wednesday: MHIP Day vawi 42-na a ni a, Mizoram hmun hrang hrangah lawm a ni. MHIP Day lawmna hi MHIP general headquarters hruaitute’n hmun hrang hrangah an hmanpui a, ram hruaitute pawhin hmun ṭhenkhatah hmanpui bawk.

7th. Thursday: MNF founder president Laldenga thih champha a ni a; he ni pual hian MNF-te chuan Treasury Square-a Laldenga thlânah hriatrengna inkhawm an buatsaih a, hruaitute’n zahna pangpar an dah. Laldenga hi July 11, 1927-ah Lunglei Pukpui khuaah a piang a, kum 1944-ah British Indian Army a zawm a, kum 1959-ah Mizo National Famine Front dinin, chu pawl chu October 22, 1961-ah Mizo Natinal Front (MNF) tiin an thlak a ni. Kum 1986 khan Mizoram sorkar lailawk (interim)-ah Chief Minister niin, kum 1987-a Mizoram state Assembly inthlan hmasa berah Sateek leh Aizawl North-II bial aṭanga thlan tlin a ni a, state nih hnua Chief Minister hmasa ber a ni.
8th. Friday: Prime Minister Krishi Sinchayee Yojana (PMKSY) hnuaia programme leh scheme hrang hrangte thlunzawma thawhho dan tur thlirhona, ‘Workshop on Convergence of Project under PMKSY (Watershed Development’ chu nimin khan Aijal Club-ah neih a ni.

9th. Saturday: H.Lalnunhlima (31), Zawlnuam Ṭhuampui Veng chu an veng field bula tuikhuahah a tla hlum. H.Lalnunhlima hi a insil lai a chesual a, a tlak aṭanga rei loteah a ruang lak chhuah nghal a ni.
10th. Sunday: Baptist Church of Mizoram chuan tun hnaia missionary atana an lak thar mi 13 tirhchhuah inkhawm biak in pathumah an buatsaih.Ramhlun South biak-inah missionary pathun, Pukpui biak-in ah missionary panga leh Ramzotlang biak inah missionary pang tirchhuah an ni. Missionary tirh chhuah inkhawm hi BCM hruaitute’n an hman pui.
11th. Monday: Kolasiba thuthar thehdarhtute chuan Kolasib Rengtekawn thlanga UD&PA dept.-in Di Hmun Tlanga Solid Waste Management Centre an thawh mek an tlawh a, contractor pahnihin lung chhia an hmang tih an hmu chhuak.Thuthar thehdarhtute chuan lung chhiate chu hnawl turin UD&PA dept. aṭanga hnathawh viltu hnenah an ngen nghal.

12th. Tuesday: Agriculture dept. chuan Lunglei DAO conference hall-ah an department hnuaia NLUP trade thlangtute hnenah ṭanpuina sum an sem. Ṭanpuina hi Lunglei Circle huamchhunga WRC-I, WRC-II leh oil palm chin thlangtu mi 94-te hnenah cheng nuai 10.3/- sem a ni.

13th. Wednesday: Chief minister Lal Thanhawla hoin a pisa-ah Mizoram chhunga venhimna chungchangah meeting neih a ni a, international leh state boundary-ah venhimna ngawrh leh uluk zawka kalpui a pawimawh thu sawilan a ni.

14th. Thursday: Mizoram Board of School Education (MBSE) chuan High School Leaving Certifcate leh Higher Secondary School Leaving Certifcate (compartmental) result a ti chhuak a, HSSLC-ah chuan mi 550 exam-in 405 an passed. HSSLC-ah chuan arts-ah mi 141 exam-in 111 an passed a, science-ah mi 20 exam-in 15 an passed a, commerce-ah mi pathum exam-in pahnih an passed a ni.

15th. Friday: Mamit District MJA president Lalhlupuia (55) chu kal (kidney) leh thin (liver) ṭha lo vangin Aizawl Civil Hospital-ah a thi. Lalhlupuia hi Zo-Lamtluang chanchinbu editor a ni a, a nupui Rosangpuii Khiangte leh a fate a kalsan a ni.

16th. Saturday: Mizo Hmeichhe Ṭangrual chuan Working Women’s Hostel, Khatlaah an kum 70-na tlin an lawm a, Social Welfare minister PC Lalthanliana leh Mizoram Women’s Commission chairperson Vanlalawmpuii Chawngthu, MLA ten an hmanpui. Mizo Hmeichhe Ṭangrual hi July 16, 1946-ah Mizo High School, Mission Vengah din a ni a, president hmasa ber chu Lalthanzami a ni. An tum ber chu Mizo hmeichhia leh naupangte dinhmun chawikân leh tihhmasawn a ni a, an din tirh aṭanga tun thlengin fahrah leh naupang enkawlna Motherless Babies’ Home bakah, Working Women’s Hostel an enkawl mek a ni. 
17th. Sunday: Presbyterian Sihphir Pastor Bialtu pastor, Rev H.Laltlanthanga chuan a bial chhunga Venglai kohhran tlawhin chawhnuah Lalpa Zanriah Sakrament a theh a, zanah thu a sawi bawk.
18th. Monday: Assembly deputy speaker R.Lalrinawma chuan a bial chhunga Sihphir Higher Secondary School leh Urban Public Health Centre hnenah thilpek a hlân. Sihphir HSS hnenah hian white board pathum, ṭingṭang leh chair vir thei a pe a; PHC tan tui tih vawhna leh steel almirah a pe thung.

19th. Tuesday: Kolasib DC H.Lalengmawia chuan Bairabi rél chawlhhmun tlawhin, rél lian a luh tak avangin chak zawka ILP endik a nih theih dan tur a enfiah a; rêl chawlhhmunah ILP pek chhuahna tur siam thuai a nih dawn thu a sawi. Kolasib DC hi SP C Lalzahngoa leh Bairabi khawtlang hruaitute’n an ṭawiawm a ni.

20th. Wednesday: Mamita Cooperative Apex Bank-ah chhiatrupna a thlen thulha inven dan tur leh chanchhuah hna thawh dan lemchan (mock drill) neih a ni a, a bul hnaia office leh mipui ṭhahnem tak an tel. Mock drill zawhah 4th. IR battalion-a State Disaster Response Force (SDRF) team-te’n damlo leh hliam chhanchhuah dan mipui an zirtir nghal. 

21st. Thursday: Mizoram police-a Northern Range huam chhunga SP leh Traffic SP-te chuan DIG (NR) LT Hrangchal hoin a pisaah Crime Review Meeting an nei a; thil tisual tua puh te, a bik takin POCSO Act (naupang humhimna dan) bawhchhiate a hun taka chargesheet thehluh hman loh vanga bail-a chhuahtir an awm loh nan ṭan lak lehzual ni se tih an rêl.
22nd. Friday: Mizoram Hindi Prachar Sabha (MHPS) chuan first session 2016-a Hindi Prabodh (pawl 10), Hindi Visharad (pawl 12) leh Hindi Praveen (B.A) exam result a tichhuak a; a pumpuia pass percentage chu 95.85% a ni.

23rd. Saturday: ‘Ethel’ tih lehkhabu chu parliamentary secretary Joseph Lalhimpuia’n IPR Auditorium-ah a tlangzarh. ‘Ethel’ tih lehkhabu hi Ethel Zotluangpuii, Hlimen, cancer natna vei mek ṭanpuina tura ṭhangthar ziaktu mi 24-te thuziak dahkhawmna a ni a; essay, fiction leh poetry hrang hrang a awm.

24th. Sunday: Pi Vannghaki (83), m/o Biakveli, Khatla chu thawhah avangin a boral.

25th. Monday: Chief minister Lal Thanhawla chuan, Mizoramah Aadhaar card pek chhuah a muan vangin Mizo mipuite’n harsatna an tawh thu prime minister Narendra Modi hnenah ziaka thlenin pek chhuah chak a nih theihna atan hma la turin a ngen. 

26th. Tuesday: Lunglei HPC vice chairman S.Laldingliana hoin a pisaah MJA member, YMA Lunglei sub-hqrs leh Chhimbial Chhantu hruaitute’n Mizoram chhim lama thlawhtheihna ṭumhmun atana hman theih tur âwma an ngaihte an sawiho. Meeting-ah hian Phaileng South-a tlangdung pakhat an enfiah thlirlet a ni a; a chhehvel tlangte avangin hmun dang en ṭha an ti a, Chithar-Vaisam leh South Chawilunga tlangdungte zir chiang turin a hmuna enfiah leh thuai an rel.

27th. Wednesday: Mizoram State Cooperative Union (MSCU) Board of Directors chu an president Lianthangpuia hoin a pisaah an ṭhukhawm a; kum 2017-18 atana budget tura ruahman cheng nuai 281/- an pawm.

28th. Thursday: Horticulture department leh North East Initiative Development Agency (NEIDA) chuan Horticulture conference hall-ah kut hnathawktute hamṭhatna tura hna thawhhona turin memorandum of understanding (MoU) an ziak. MoU ziah inkhawm hi Horticulture joint secretary Lalhrangliani’n a kaihruai a ni. MoU-ah hian Horticulture department aiawhin secretary B.Lalhmingthanga leh NEIDA aiawhin executive director Dharani Ratno ten hming an ziak.
29th. Friday: KVK, Lawngtlai chuan Chawnhù-ah Free Animal Health Camp & Vaccination hun an hmang a, senior scientist Dr Michelle C.Lallawmkimi leh scientist Dr Lalthazuali ten ui 20 leh ran dang 121 a thlawnin an enfiah.
30th. Saturday: Ṭhalai Kristian Pawl (ṬKP) din champha vawi 65-na a ni a, Mizoram hmun hrang hranga ṬKP unit leh bialte’n mahni remchan dan ang angin an lawm.An jubilee thupui chu ‘Remna siamtu’ tih a ni.

31st. Sunday: Darngulliana (49), Kelsih khua chuan a nupui Vanlalhnemi (30) a vaw hlum.

Mind blowing scenes of Tlawng River in Mizoram

1st. Monday: Champhai Ṭhalai Pawl (CṬP) chuan Kahrawt YMA Hall-ah inkhawmpui an hmang a; resolution pahnih, ‘Hun rei tak Champhai Tlangsama polytechnic building sak zawh tawh tun thlenga luah loha a awm reng hi sorkarin hma la vat rawh se’ tih leh, ‘Champhai District Hospital-a thawktu indaih lo phuhru tur leh nursing school hi a rang thei ang berin sorkarin min hawnsak rawh se’ tihte an pass.

2nd. Tuesday: Siaha DC kal chhuak tur R.Zarzosanga chuan DC thar, Harleen Kaur hnenah DC mawhphurhna a hlan. R.Zarzosanga hian ATI director hna a chelh zui ang.

3rd. Wednesday: Mizoram police-te chuan tualthah thubuai vanga mana Central Jail-a tang Lalrindika (26) s/o Vanlalchhunga, West Lungdar, July 9, 2016-a tlanbo chu West Lungdar aṭanga km. 6 vela hla Tlawng phai¬ah an man. Lalrindika hi January 31, 2016 khan a pa ú fapa thah thubuaiah man a ni a, a thubuai Court-a chinfel a nih hmain jail aṭang hian a tlan chhuak a, jail aṭanga tlanbo thubuai pek belh a ni.

4th. Thursday: Mualṭhuam leh Kang¬hmun handloom cluster-a puantah zir chhuakte hnenah Mualṭhuam community hall-ah puantahna in sakna tur leh puantah khawl sem a ni a, minister PC Lal¬thanliana’n a hmanpui.

5th. Friday: Suangpuilawn khua chuan an khaw khel¬mual¬ah Sapthei Kût an hmang a, Horticulture minister PC Lalthanliana’n khuallian niin a hmanpui. Sapthei Kut hi AH&Vety minister C.Ngunlianchunga, NLUP Implementing Board chairman JH Rothuama leh bialtu MLA Dr Ngurdingliana te pawhin an hmanpui a; tlaiah kût ruai an theh nghal. In 400 vel awmna Suangpuilawn khaw mite hi kum 20 vel chhung sapthei an lo ching tawh a, tunah hian chhungkua 40 velin an ching mek. An thar chhuahte chu MIFCO processing fruit, Chhingchhipah an hralh ṭhin a, kum 2015 khan quintal 400 vel an hralh a ni.

6th. Saturday: Saron Veng Indoor Hall sak mekah celling siam lai a chim a, ceiling siamtute zinga mi Vanneihkima, Bethlehem Veng chu damdawi-in thlenpui a nih hnuah a thi. Lalfakmawia, Bethlehem Veng leh Lalhriatpuia, Chite Vengte an hliam bawk.

7th. Sunday: Durtlang leh Zuangtui inkar Leitan Ramthar Veng Chhochhuah hmun¬ah car a chesual a, Lal¬rinawma Lianhna (23), Lunglei Serkawn a thi. Motor-ah hian mi pali an chuang a, midang hian hliam an tuar vek a ni.

8th. Monday: MLA Chalrosanga’n a bial, Lunglei West chhunga chhungkaw 20 tana Rural Housing Scheme aṭanga rângva bundle li ṭheuh a pek chu a dawngtute hlân anni.

9th. Tuesday: Inter¬na¬tio¬nal Day of World Indigenous People (Tual¬ṭo Hnamte Ni) a ni a; Zo Re-Unification Organisation (ZORO) chuan an pisaah an hmang. ZORO chuan reso-lution pass in, Zofa ṭhen darh leh awp darh¬te chu rethei takin India, Myanmar leh Bangladesh ramri hrûlah tlemtê têin, hmasâwn chak lo takin an khawsa mek niin an tarlang a, “India sub-continent vela Zofate chênnaah hian socio-economic & traditional and cultural centre dinin, khawvel zirna changkangte el pha, Zo International Uni¬versity leh damdawi-in changkang, medical college-a thuam, Zofate’n an mamawh zirna changtlung leh vantlang hriselna pe thei tur din ni rawh se,” an ti.

10th. Wednesday: Mizoram State Library chu MJA Public Library hruaitute’n tlawhin, lehkhabu pindan hrang hrang an fang. State Library-ah hian kumin July thla tawp thleng khan member 5,896 an awm a, lehkhabu 60,056 an nei mek. MJA member-te hi State Library-a librarian Lalramliana leh assistant librarian Zirsangzuali ten an lo dawngzawng a, thil pawimawhte an sawiho. Lalramliana chuan, an awmna hmun a fuh tâwk loh avangin tlawhtu an nei tlem tih a sawi a, “A thawktute hi chu kan nuam a, building pawh kan nei ṭha a; mahse, mipui tana a chhawrnahawm lo leh hmang ṭangkaitu an tlem hi hrehawm kan ti hle a ni,” a ti.

11th. Thursday: Higher & Technical Education minister R.Romawia chuan, Aizawl West College-ah NIELIT Study Centre a hawng. NIELIT Study Centre tharah hian college zirlaite’n sum tlémtê chawiin computer course, Certificate in Computer Concept an zir thei dawn a ni. Aizawl West College-ah hian zirlai 942 leh zirtirtu 38 an awm mek a ni.

12th. Friday: Zirna-in, sorkar department leh tlawmnngai pawlte library enkawltute pualin Mizoram State Library bultumin Chanmari YMA Hall-ah Librarian’s Day hman a ni a, Art & Culture minister R.Romawia’n a hmanpui. He hunah hian library-a lehkhabu chhiar taimate hnenah lawmpuina hlan a ni. Art & Culture Minister chuan, Mizote zingah lehkha chhiar ngut ngut aiin titinaa fiamthu nena ri huau huaute an langsar fo nia sawiin, “Lehkha chhiar taimate kan ngaisang lo a, lehkha ziaktute pawh kan ngaisang lem lo. Hemi kawngah hian zir tur kan ngah a, khawvel thiamna tuikhur in a, mi dang hnena thiamna petute ngaisan nachang kan hriat a ngai,” a ti. Librarian’s Day hi kum 2009-ah hman ṭan a ni a, Father of Indian Library Science an tih, Dr SR Ranganathan pian ni, August 12-ah hman ṭhin a ni.

13th. Saturday: UPC (North East India) College Veng biak-in thar chu UPC Aizawl East district superintendent Rev. Rosanga Kawlni-in a hawng. Biak-in hi nuai 36/- vel sênga sak a ni a, hnatlang thâ 700 chuang sen a ni. A dung ft. 45 leh a vâng ft. 32-a liana sak a ni.

14th. Sunday: Zarkawt Presbyterian Kohhran biak inah Mizoram Synod chuan missionary tirh chhuahna inkhawm an hmang. Inkhawm hi Synod executive secretary Rev. B.Sangthanga’n a kaihruai a; Synod Mission Board co-ordinator Dr Robert S.Halliday in inhmelhriattirna hun hmangin, moderator Rev. H.Lalrinmawia’n missionary-te a tirh chhuahna hun a hmang.

15th. Monday: India Independence Day vawi 70-na chu ram pumah lawm a ni a, Mizorama a lawmna pui ber, Lammuala neihah chief minister Lal Thanhawla’n hnam puanzar a pawt pharh. CM chuan thuchah sawiin, “Kan sorkar chhung chuan NLUP hi kan sem zel dawn,” a ti.

16th. Tuesday: Governor Lt.Gen. Nirbhay Sharma chuan, Aizawla Mizoram State Museum a tlawh a, a nupui Jyotsna Sharma leh an mikhual neih mekte’n an ṭawiawm. Larsap hian Mizoram State Museum-a gallery hrang hrang a fang kual a; museum pawimawhna leh hnam rohlu vawn ṭhatna kawnga a pawimawhzia sawiin, “Mizoramin museum chhuanawm tak a nei a ni. Hnam ropui apiangin pi leh pute kutchhuak, sûlhnu leh nunphungte ngaihsan nacháng an hre ṭhin,” a ti.

17th. Wednesday: Aizawl Municipal Corporation (AMC)-in Bazar Bungkawna kawngpui kânna tur, pedestrian overbridge an siam thar chu AMC mayor PC Lalhmingthanga’n a hawng. Bazar Bungkawna pedestrian overbridge sàn zawng hi metre 5 a ni a, metre 20-a sei, a chhuat zau zawng metre 1.5 leh a chung khuhna hlai zawng metre 2.7 a ni.

18th. Thursday: Mara Autonomous District Council (MADC)-a nominated seat luah turin K.Mahei-a (Congress party) chu rinawmna thu tiam tira lak luh a ni. MADC-a nominated seat-a ruat Khaitha chu tun hnaiah a thih avangin a hmun ruak hnawhkhat turin K.Mahei hi lakluh a ni.

19th. Friday: Union of minister of state for Railways Rajen Gogain chuan, Ailawnga pasalṭha Khuangchera thlân a tlawh a, zahna chibai bûkin, pangpar a dah.

20th. Saturday: Kolasib District Anti Tobacco Squad-te chuan Diakkawn Bazar, auto-rickshaw leh taxi stand-ahte squad drive an nei a, phal lohna hmuna mei zu mi pariat an man a, dan angin pawisa an chawitir nghal.

21st. Sunday: Baptist Church of Mizoram (BCM) ni pawimawh ‘Theological Education Sunday’ a ni a, Mizorama Baptist Kohhran biak-in tinah hun hman niin, thupui chu ‘Pathian thu thil tih theihna’ tih a ni.

22nd. Monday: Tun hnaia ruahsûr nasa avangin Lawngtlai Chandmary Venga Vannawlthanga in, Assam type, chhungkaw pathum luah lai a chim a, mi pakhat a hliam.

23rd. Tuesday: April 2015-a V/C inthlanpui ruala inthlan ve theih lohna, Khawzawl Electric Vengah village council bye-elec¬tion neih a ni a, tluang takin vote thlak a ni.Helai hmunah hian general seat pali leh reserve pakhat thlan a ni a; Congress party-in seat pali an la a, MNF thlawp independent candidate pakhat a tling bawk. Independent candidate tling hi hmeichhia a ni. He inthlannaah hian vote 72.21% a tla a ni.

24th. Wednesday: Serchhipa Legal Metrology hotute chuan Serchhip khawpuia retailer-te ko khawmin, buhfai leh thil dang hralh chhuahnaa an hman ṭhin bûklungte a dik leh dik loh an enfiahsak. Bûklung enfiahte hi an dik tlangpui hlawm a, thil tê tham siamṭhatsak erawh pahnih/khat an awm.

25th. Thursday: Lungleia Legal Metrology enforcement, Anti Tobacco Squad leh police-te chuan Zobawk leh Hrang¬chalkawnah joint operation an nei a, dawr¬kai 14 hnen aṭangin ram dang meizial báwm carton 33 leh packet 330 an man. Cigarrete an mante hi a báwm a inziak tur – MRP, manufaturer leh health warning inziah loh vang leh chhiah pe loa India rama lak luh a nih avangin The Legal Metrology Act 2009 (Package Commodities Rules 2011) hmangin man a ni a; Farstar, V cigarrete, Windbody, etc. te zuar lo turin sumdawngte a hriattir nghal a ni.

26th. Friday: Guwahati-a North East Tea Conclave & Expo 2016 neihah Mizo Tea (Ngopa Tea Pvt.Ltd.) chuan Queen of Speciality Tea Award an dawng. Conclave & Expo-ah hian thingpui fê siamtu 180 chuang an tel a, Mizo Tea hian lawmman pahnihna a dawng a ni.

27th. Saturday: Upper Republic Branch KṬP chuan blood donation campaign an huaihawt a, Synod Hospital tan mipa 26 leh hmeichhia pakhatin thisen unit 27 an pe.

28th. Sunday: Mizoram Journalist Association vice president hmasa ber C.Chhunbura (92), Mission Vengthlang chu lungphu châwlin a thi. C.Chhunbura hian Zoram Thupuan tih chanchinbu a enkawl ṭhin a, kum 1972-1974 chhung MJA vice president a ni.

29th. Monday: MZP sub-headquarters, Lungsen chuan Lungsena middle school leh high school zirlaite pualin essay ziaka inelna an buatsaih. Pawl 5-10 zirlaite puala essay ziaka inelnaah hian thupui chu ‘Ram leh hnam humhalh’ tih leh ‘Ṭanrual hi chakna’ tihte a ni a; zirlai 50 vel an tel a ni.

30th. Tuesday: Ni hnih awh tur Mizoram Assembly Emergency Session chu ṭan a ni a, Good & Service Tax (GST) hman a nih dawn vanga India danpui tihdanglamna tur pawm a ni.

31st. Wednesday: Mizoram Assembly emergency session, ni hnih awh chu chhunzawm a niin tih tawp nghal a ni. Session-ah hian ‘The Mizoram Motor Vehicles Taxation (Ammendment) Bill pass a ni.Ni hnih awh Assembly session-ah hian paper pasarih pharh a nih bakah, Assembly hnuaia Committee hrang hrangin report pali an thehlut a ni.